Pantai bapasia putiah jo panginapan di Pulau Tioman
Pulau Tioman adolah sabuah pulau ketek nan barado di Pahang, Malaysia, lataknyo 32 km di lapeh pantai timua Malaysia,[1] dan panjangnyo pulau iko kiro-kiro 20 km jo leba nyo kiro-kiro 12 km. Pulau iko punyo salapan desa utamo, Desa nan paliang gadang jo paliang padek panduduaknyo banamo Kampuang Tekek nan latak nyo di sabalah utara. Pulau iko mampunyoi hutan nan rimbo sarato jo dikaliliangi dek tarumbu karang sahinggo manjadi tampek nan rancak untuak kagiatan scuba diving. Ado juo tadapek banyak panginapan jo vila di sakitaran pulau nan punyo status bebas bea.
Pulau Tioman marupoan bagian dari distrik Rompin Pahang, maskipun sacaro geografis labiah dakek ka Johor. Untuak manuju ka pulau iko biasonyo pajalanan dimuali dari Jalan Raya Tebrau, Johor Bahru manuju ka Mersing malalui Kota Tinggi. Kalau dari Jalan Raya Karak, Kuala Lumpur malalui Temerloh, Kuantan, Pekan, Kuala Rompin, Tanjung Gemuk ka Mersing. Atau lewat Jalan Raya PLUS dari Kuala Lumpur malalui Seremban, Bahau, Muadzam Shah, Kuala Rompin, Tanjung Gemuk kamudian tibo di Mersing. Dari Mersing barulah pangunjuang mamakai layanan kapa feri untuak manyubarang ka Pulau Tioman.[2]
Sijarah
Sajak ribuan taun nan lalu, Pulau Tioman digunoan dek nalayan sabagai titiak navigasi pantiang, sumber aia janiah jo kayu[1]. Pulau iko alah manjadi tampek singgah bangso Cino, Arab, sarato jo kapa-kapa dagang Eropa. Pacahan porselen dapek ditamui di sakitaran pantai. Katiko parang dunia kaduo, Pulau Tioman dijadian tampek balabuahnyo pasukan Inggris jo Jepang sahinggo parairan sakitaran pulau, panuah jo siso-siso parang sarupo HMS Repulse[3] jo HMS Prince of Wales[4][5]
Kaadaan Pulau
Wilayah lauik Pulau Tioman sarato jo dalapan pulau-pulau tadakek lainnyo alah dinyatoan sabagai taman lauik jo cagar laut[1]. Pado taun 1972, baragam kahidupan lauik jo daerah padalaman hutan tropis dilinduangi sabagai Hutan linduang Pulau Tioman. Namun pado taun 1984, sabagian gadang wilayah pulau digunoan untuak pambangunan pertanian jo wisata; daerah nan tasiso kiro-kiro tingga labiah kurang 8.296 ha. Babarapo spesies mamalia dilinduangi di pulau tu, tamasuak binturong, monyet ikua panjang, kukang, tupai hitam raksasa, tupai terbang merah raksasa, kancil, landak, jo musang, dari sabanyak 45 spesies mamalia jo 138 spesies buruang, tamasuak frigatebird[1]. Salain tu, di pantai Pulau Tioman tadapek spesies nan endemik. Ikan lele Clarias batu dapek dicaliak di hutan tropis[6].
Rujuakan
↑ abcdAbdul, Jasmi (1999). "An Introduction to Pulau Tioman"(PDF). The Raffles Bulletin of Zoology. National University of Singapore. Supplement No.6: 3–4. Diarsipkan dari versi asli(PDF) tanggal 2013-10-19. Diakses tanggal 2019-11-05.
