Museum Parang Sintuak talatak di Nagari Sintuak, Kecamatan Sintuak Toboh Gadang, Kabupaten Padang Pariaman, Provinsi Sumatera Barat. Museum iko didirikan untuak mamparingati jo malestarikan sijarah pajuangan kamardekaan Indonesia di daerah Sintuak. Museum iko marupokan inisiatif swadaya dari masyarakaik lokal, dengan pandirinyo, Rio Tampati Putra, nan mangumpuan artefak sijarah sajak ketek.[1]
Sijarah
Bangunan nan dijadian Museum iko dihibahkan dek nan punyo tanah jo bangunannyo kapado masyarakaik Sintuak untuak dijadian museum. Bangunan iko dibangun pado taun 1945 jo dijadian sabagai pos pangamatan pajuang pado taun 1948. Museum iko didirikan karano paristiwa nan basijarah nan alah banyak talupoan, yaitu Parang Sintuak nan tajadi di Nagari Sintuak Toboh Gadang pado hari Selasa, tanggal 7 Juni 1949, nan marupokan paristiwa tragis basijarah dimano tajadi pambunuahan massal kapado pajuang kamardekaan dek pihak kolonial Belando.[2]
Parasmian museum iko dilakuan pado Mei 2021 nan diharokan manjadi sarana edukasi sijarah bagi warga satampek jo pangunjuang dari lua daerah.[3] Pamarentah Kabupaten Padang Pariaman sangaik mandukuang kabaradoan museum iko jo baharok dapek maagiah nilai positif untuak dunia pendidikan, dengan koleksi nan bavariasi jo fasilitas nan ado, museum iko diharokan dapek meningkekan samangek pajuangan jo mampakayo wawasan sijarah untuak generasi mudo.
Koleksi
Museum Parang Sintuak manyimpan sakitar 300 unit koleksi basijarah, nan mancakuik:[4][1][2]
- Sanapan jo palangkapan parang: Babagai sanjata nan digunoan salamo maso pajuangan kamardekaan.
- Replika baju parang: Pakaian nan digunoan dek pajuang salamo parang.
- Helm tantara Balando: Helm nan digunoan dek tantara kolonial Balando.
- Pitih lamo jo foto prajurik Balando: Pitih nan baredar pado maso panjajahan sarato foto-foto tantara Balando.
- Sanjato tradisional: Koleksi sanjato tradisional sarupo tombak, panah baracun, trisula, jo kurambiak.
- Barang antik rumah tanggo: Teko, cerek abaik ka-19, lampu padati, jo produk rumah tanggo lainnyo dari maso saisuak.
Fasilitas jo aktivitas
Museum iko manyadioan babagai fasilitas untuak pangunjuang:[5]
- Area foto: Pangunjuang dapek bafoto jo replika pakaian jo sanjato pajuang.
- Edukasi jo panalitian: Museum aktif dalam kagiatan edukasi sijarah jo panilitian, acok kali malibekan palajar jo panaliti untuak mampalajari labiah dalam tantang pajuangan kamardekaan di Sintuak.
Pangalolaan
Museum iko dikalola dek masyarakaik lokal jo dukuangan dari pamarentah Kabupaten Padang Pariaman jo Asosiasi Museum Indonesia Daerah (AMIDA). Pamarentah satampek sadang mangupayokan legalitas museum iko sabagai cagar budaya untuak mampakuaik paranannyo dalam pandidikan sijarah jo kabudayaan.
Museum iko indak manatapan biaya masuak untuak pangunjuang. Sabagai gantinyo, pangunjuang dapek maagiah sumbangan sukarela nan digunoan untuak mandukuang operasional jo pangambangan museum.
Paran jo tujuan
Museum Parang Sintuak batujuang untuak mangedukasi masyarakaik manganai sijarah pajuangan kamardekaan Indonesia, khususnyo di wilayah Sintuak. Malalui koleksi jo kagiatan nan disalanggaroan, museum iko barupayo mananaman raso cinta tanah aia jo mangharagoi nilai-nilai pajuangan kapado generasi mudo.[6]
Untuak informasi labiah lanjuik, pangunjuang dapek manghubuangi Dinas Pendidikan jo Kabudayaan Kabupaten Padang Pariaman atau mangunjuangi situs resmi inyo.
Museum Parang Sintuak adolah bukti nyato dari samangaik jo usaho masyarakaik untuak manjago jo malastarian sijarah pajuangan bangsa, sarato manjadi sumber inspisi untuak ganerasi mandatang untuak mamahami jo mangharagoi pajuangan para pahlawan.
Rujuakan
- ↑ a b Maskur, Fatkhul (2021-04-18). "Wah, Ada Meseum Perang di Sintuk Padang Pariaman". Bisnis.com. Diakses tanggal 2024-05-27.
- ↑ a b "Desa Wisata Sintuak". DINAS PARIWISATA PEMUDA DAN OLAHRAGA (dalam bahasa Inggris). Diakses tanggal 2024-05-27.
- ↑ Agency, ANTARA News (2021-04-18). "Warga Padang Pariaman dirikan museum perang secara swadaya". Antara News Sumbar. Diakses tanggal 2024-05-27.
- ↑ "Pemuda Inisiasi Berdirinya Museum Perang Sintuk" Archived 2024-05-27 di Wayback Machine.. Scientia Pembangunan. 2021-04-16. Diakses tanggal 2024-05-27.
- ↑ Agency, ANTARA News (2021-04-18). "Warga Padang Pariaman dirikan museum perang secara swadaya". Antara News Sumbar. Diakses tanggal 2024-05-27.
- ↑ Thursday, Piaman Explore; August 25; 2022. "Museum Perang Sintuk Padang Pariaman Hadirkan Berbagai Koleksi Peninggalan Perang". Piaman explore. Diakses tanggal 2024-05-27.
