Muhammad bin Muhammad Taib (bahaso Jawi: محمد بن محمد طيب; lahia 29 Juli 1945; umua 79 taun), dikana juo jo namo Mat Taib jo Mat Tyson, adolah saurang politikus Malaysia nan kini manjabat sabagai anggota United Malays National Organization (UMNO), satuan utamo koalisi Barisan Nasional (BN). Inyo adolah mantan Menteri Besar Selangor jo mantan Menteri Pembangunan Pedesaan dan Regional. Muhammad marupokan mantan wakil presiden UMNO.[1]
Kahidupan awal jo pandidikan
Muhammad Taib lahia di Kampung Sungai Manggis, Kuala Kalumpang, Hulu Selangor, inyo barasa dari Minangkabau, dari Rao, Sumatera Barat. Inyo basakolah di Sakola Bahaso Inggirih di Kuala Kubu Baru. Muhammad adolah lulusan dari Universitas Malaya jurusan Sejarah jo Studi Malayu, sarato mantan guru di SMK Kuala Kubu Baru.[2]
Karier politik
Muhammad adolah mantan anggota Majelis Negeri Selangor dari Batang Kali salamo ampek periode, nan manang pado pamilihan umum 1982, 1986, 1990 jo 1995. Inyo manjabat sabagai Menteri Besar Selangor dari 1986 sampai 1997.[3] Namun, inyo dipaso untuak maunduran diri sabagai Menteri Besar Selangor pado bulan April 1997 sasudah inyo ditangkok di Australia karano kapamilikan mato uang sanilai labiah dari A1.2 juta dolar (RM2.9 juta).[4]
Pado taun 2006, inyo ditunjuak sabagai Senator di Dewan Negara Parlemen Malaysia.[5] Hal iko mambuek inyo ditunjuak sabagai menteri dek Perdana Menteri Abdullah Ahmad Badawi pado bulan Maret 2008.[6][7] Inyo basaing untuak maisi jabatan Wakil Presiden UMNO pado bulan Maret 2009 tapi barado di urutan kaduo satalah Muhyiddin Yassin.[8] Posisi jabatannyo di Kabinet barakhir sasudah adonyo parombakan dek Perdana Menteri nan baru, Najib Razak, pado bulan April 2009.[9]
Pado 14 April 2013, Muhammad bagabuang jo Partai Islam Pan-Malaysia (PAS), anak dari partai Pakatan Rakyat (PR) pado maso itu.[10] Inyo sacaro rasmi diperkenalkan dek partai pado tanggal 22 April 2013, duo hari sasudah hari nominasi Pamilihan Umum ka-13 untuak menghindari tuduhan baso inyo dicalonan pado pamilihan umum. PAS adolah satu-satunya partai nan mangarahkan Malaysia manjadi Islami, manuruik Muhammad.[11] Muhammad adolah saurang kritikus nan lantang mangkritik pamarentah Selangor. Inyo manyatoan baso Pakatan Rakyat Selangor, di bawah pimpinan Menteri Besar Selangor Khalid Ibrahim, alah hilang kakuasaannyo ateh Selangor. Inyo bahkan manarangkan baso inyo picayo kalau Saiful Bukhari Azlan, nan dituduah ateh kasus pelecehan seksual Anwar Ibrahim, adolah korban sabananyo dan indak ado saurang pun nan mambantu Saiful Bikhari.[12]
Pado 10 September 2015, Muhammad maninggakan PAS kamudian bagabuang jo Partai Keadilan Rakyat (PKR) dari koalisi oposisi Pakatan Harapan (PH).[13]
Pado tanggal 17 September 2017, Muhammad bagabung baliak jo UMNO, nan diumumkan dek Najib Razak pado konferensi media khusus. Inyo bagabuang sasudah maninggakan UMNO untuak manjadi anggota oposisi salamo ampek taun.[14][15]
Kontroversi
Pado taun 1987, Muhammad, wakatu itu inyo masih manjabek sabagai Menteri Besar, manyababkan Sultan Selangor berang katiko dikatahui baso inyo sacaro sambunyi-sambunyi manikah jo anak gadih Tengku Puteri Zahariah di Sungai Golok, Thailand. Sultan kamudian manarimo pamintaan maafnyo.[12]
Pado taun 1997, Muhammad dipaso untuak maundurkan diri sasudah inyo ditangkok di Australia baso inyo mambuek deklarasi mato uang fiktif sanilai jutaan dolar nan ditamukan di kopernyo katiko inyo maninggakan nagara tu.[4][12] Namun, inyo dinyatoan indak basalah, sasudah manyatokan baso inyo indak mangarati formulir deklarasi nan ditulih dalam bahaso Inggirih.[16] Akan tetapi, dalam parkambangan tarakir, panyalidikan manamukan baso pangadilan alah salah dalam manatapkan putusannyo.[17]
Pado 19 Agustus 1997, katiko Mahkamah Federal Brisbane mandakwa inyo ateh pamilikan pitih labiah dari A$5,000, inyo jo bininyo tingga babarapo minggu di Brisbane jo barancana nio mambuek rumah mewah di tanah salueh 4.500 hektar di Gold Coast, Queensland. Sasudah tu inyo pai ka Selandia Baru. Tanah di Pulau Sovereign didaftaran ateh namo bininyo Asbi Rohani Binti Asnan nan dibali satahun sabalunnyo saharago $3 juta.[18][19][20] Muhammad Taib kamudian dituduah indak mandaftaran asetnyo.[21]
Kahidupan pribadi
Muhammad manikah jo bini partamonyo, Asbi Rohani Asnan, katiko inyo mangaja di Tanjung Malim. Pasangan iko punyo ampek urang anak padusi jo saurang anak laki-laki.[22] Inyo juo manikah jo anak gadih Sultan Selangor, Sultan Salahuddin Abdul Aziz Shah Alhaj ibni Almarhum Sultan Hisamuddin Alam Shah Tengku Puteri Zahariah binti Sultan Salehuddin Abdul Aziz Shah, nan dikana juo sabagai Kuyah, tapi kemudian inyo bacarai. Inyo diagiah gala Yang Amat Mulia pado maso itu sarato Yang Berhormat Mulia. Pasangan iko punyo surang anak laki-laki.[23] Inyo juo manikah jo Dr. Rodzina Hayati Tajul Ariffin, nan dikaruniai ampek urang anak laki-laki jo surang anak padusi.[24]
Rujuakan
Pautan lua
