Jo jumlah panutua sabanyak 278 juto jiwa, bahaso Rusia marupoan bahaso tagadang kalimo dari segi jumlah panutuanyo sasudah bahaso Mandarin, Inggirih, Spanyol, jo Hindi.[4] Bahaso iko juo manjadi bahaso rasmi PBB jo badan-badan khususnyo salain bahaso Arab, Parancih, Mandarin, Inggirih, jo Spanyol. Salain itu, bahaso Rusia ko juo digunokan sabagai bahaso rasmi Persemakmuran Nagara-nagara Merdeka.
Bahaso Rusia adolah bagian dari bahaso Slav dari kaluargo bahaso Indo-Eropa. Bilo dicaliak dari suduik pandang palafalan bahaso, Bahaso Rusia agak sarupo jo Bahaso Ukraine jo Bahaso Belarus di Slavia Timur, nan aka bahasonyo adolah dari Bahaso Slavia Timur Tuo. Kosa kato, bantuak kalimaik, jo sastra Rusia kabanyakan dipangaruahi dek Gareja Slavonic. Fonologi bahaso Rusia, tarutamo di bagian utara Rusia, dipangaruahi dek bahaso Finnik (bahaso Finlandia)[5][6]. Babarapo kato modern Bahaso Rusia ado juo nan barasa dari Tatar. Badasakan Institut Palinduang Bahaso di Monterey, bahaso Rusia digolongkan sabagai bahaso tingkek III, iyolah bahaso nan cukuik sulik dipalajari dek urang babahaso ibu Inggirih asli, jo butuah wakatu 780 jam intensif untuak dapek babicaro bahaso Rusia jo cukuik lanca.[7]
Panyebaran geografis
Peta penyebaran bahasa Rusia
Bahaso Rusia ditutuakan sacaro laweh di Rusia jo nagara-nagara bakeh Uni Soviet. Pado maso Soviet, bahaso Rusia digunokan sabagai bahaso superioritas jo pamarsatu, walaupun Uni Soviet tadiri dari banyak etnik jo suku bangso. Satalah bubarnyo Uni Soviet pado taun 1991, babarapo nagara bakeh Uni Soviet, sarupo Kirgizstan mamuloi untuak mamakai bahaso asli mareka dibandiang mamakai bahaso Rusia.
Kamampuan babahaso Rusia di nagara bakeh Uni Soviet, 2004.
Di Estonia, nan marupoan bakeh nagara bagian Soviet, labiah kurang 58% panduduak aslinyo mampu babahaso Rusia. Salain itu ado juo imigran dari Rusia labiah kurang 25.6% nan dapek babahaso Rusia. Salain itu, di Finlandia, jumlah penutua bahaso Rusia adolah labiah kurang 33.400 panutua. Pado abaik ka-20, bahaso Rusia manyebar jo dipalajari sacaro laweh di nagara Pakta Warsawa jo di nagara nan basakutu jo Uni Soviet. Nagara-nagara iko diantaronyo adolah Polandia, Albania, Ceko, jo Kuba. Bahaso Rusia juo ditutuakan di Israel dek 750.000 imigran Yahudi asa Rusia. Kabanyakan koran jo situs Israel mamakai bahaso Rusia. Babarapo komunitas Rusia di Amerika Utara, sarupo di Amerika Sarikaik jo Kanada juo manutuakan bahaso Rusia. Badasakan data Biro Sensus Amerika Sarikaik taun 2000, tacatek labiah dari 700.000 urang nan manutuakan bahaso Rusia sabagai bahaso sahari-hari.
Dialek dalam bahaso Rusia tabagi duo sacaro umum, iyolah dialek Utara jo dialek Selatan, jo Moskow nan talatak di daerah patangahan antar kaduonya. Pabedoan dialek nampak dari tata bahaso, kosa kato, caro pelafalan jo intonasi. Contohnyo, pado kato булошная (toko roti) nan diucapkan [ˈbuləʂnəjə] pado dialek Moskow daripado mangucapkan булочная [ˈbulətɕnəjə]. Dialek Utara jo daerah sakuliliang Sungai Volga mangucapkan huruf /o/ tanpa takanan jo fenomena iko disabuik оканье /okanye/.
Samantaro itu di daerah Timur Moskow, tapeknyo di daerah Ryazan, mareka mangucapkan huruf /e/ jo /a/ tanpa takanan jo fenomena iko disabuik яканье /yakanye/. Pado awal abaik ka-18, Mikhail Lomononsov mamuloi panyalidiakan dialek nan ado di saantero Kakaisaran Rusia. Kamudian pado abaik ka 19, Vladimir Dal manulih sabuah kamuik langkok bahaso Rusia jo dialek-dialeknyo.
