Bahaso Malayu Jambi atau Baso Jambi adolah salah satu bahaso dalam rumpun bahaso Austronesia nan ditutuaan khususnyo di wilayah Jambi inggo ka bagian selatan provinsi Riau, Indonesia. Bahaso ko indak hanyo dipakai dek urang Malayu Jambi sajo namun juo dipakai dek panduduak Jambi lainnyo nan indaklah urang Malayu Jambi sabagai alaik komunikasi antar suku bangso sarupo Kurinci, Banjar, jo Bugih nan ado di Jambi salain bahaso Indonesia. Jadi, bahaso ko lah manjadi identitas daerah provinsi Jambi.
Ado duo kontroversi tantang bahaso Jambi jo bahaso Malayu. Sabagian ahli bahaso manganggap bahaso iko sabagai dialek Malayu, karano banyaknyo pasamoan kosakata jo bantuak tuturan di dalamnyo. Samantaro nan lain justru manganggap bahaso ko marupokan bahaso mandiri nan babeda jo Melayu.
Bahaso ko mampunyoi kamiripan jo bahaso nan ado di sakaliliangnyo, tarutamo jo bahaso Malayu Bengkulu jo bahaso Palembang. Panutua bahaso Palembang jo Malayu Bengkulu masih dapek mangarati jo bahaso Jambi, sainggo kok kaduonyo basobok di lua daerahnyo tatok jo bahasonyo surang-surang.
Samantaro jo bahaso Minangkabau, baso Jambi sapinteh mirip dek samo-samo barakhiran "O". Pado umumnyo baso Jambi dapek dipahami dek panutua baso Minang. Namun, indak kasadonyo kato dalam tiok-tiok bahaso dapek saliang dimangarati. Salain itu, baso Jambi jo Minangkabau mampunyoi hubuangan sijarah dimano Minangkabau manjadi bagian ulu dari Batanghari, sadangkan Jambi manjadi ilianyo di zaman karajaan Malayupura inggo Pagaruyuang.
