Ny Venezoela, na Repoblika Bôlivarianin' i Venezoela, dia firenena any avaratra amin' i Amerika Atsimo, izay manana morontsiraka ao amin' ny Ranomasina Karaiba sy ao amin' ny Ranomasimbe Atlantika. I Caracas no renivohiny. Manana velarana mirefy 916 445 km² izy. NIisa 28 436 066 ny mponina tao aminy tamin' ny taona 2020.
Ny vohon' ny tanin' i Venezoelà dia miavaka noho ny fisian' ny faritra voajanahary maromaro: any avaratra sy avaratra-andrefana ny faritra be tendrombohitra, ahitana ny Tandavan-tendrombohitra Andes Venezoeliana (ny tendrombohitra Bolívar no tendro avo indrindra ao amin' ilay firenena, mahatratra 5 007 m). Eo afovoan' ilay firenena no ahitana ny lemaka midadasika izay antsoina hoe llanos amin' ny teny espaniôla. Manerinerina any atsimo ny Tangoron-tendrombohitra Guianas, izay faritra amazôniana anjakan' ny ala trôpikaly mikitroka. Lava ny morontsirak' i Venezoela (mihoatra ny 2 500 km). Manana nosy miisa70 eo ho eo i Venezoela. I Orinoco no ony lehibe indrindra ao amin' ilay firenena, izay manondraka ny roa ampahatelon' ny tanim-pirenen' i Venezoela izy. Madrakotra ny antsasa-manilan' ny velaran' i Venezoela ny ala izay misy karazan-kazo maro (hazo palmie, manga, sns.). Maro isan-karazany ny biby: jagoara, rajako, bera (na orsa), serfa, voay, sama, vano, sns.
Ny katôlisisma no fivavahana be mpanaraka ao Venezoela.
Mifototra amin' ny fitrandrahana solitany ny toekaren’ i Venezoela: isan' ny firenena mpamokatra solitany lehibe indrindra eran-tany ity firenena ity.
Zanatany espaniôla taloha i Venezoelà izay nahaleotena nanomboka tamin' ny taona 1811.
Jereo koa
Rohy ivelany
