Rodio

Chest artícol a l'è scricc in Lumbàrt, ortograféa orientàl unificàda.

El ròdio l'è 'n elemènt chìmich enserìt endèla tàola periòdica dei elemèncc col sìmbol Rh. El g'ha nömer atòmich 45, che völ dì che 'l nùcleo de 'n àtom de ròdio el g'ha 45 prutù. En natüra se 'l tróa sota fùrma de 'n ünech izòtopo stàbil, el ¹⁰³Rh.

L'è stat scuprìt del chìmich inglés William Hyde Wollaston endel 1803, póch tép dòpo ìga scuprìt el palàdio. El sò nòm el l'ha ciapàt de la paròla gréca rhodon che völ dì ròza, per vìa del culùr de giü dei sò compòscc.

L'è 'n metàl nòbil, che se coróde mìa tat facilmènt, de 'n culùr biànch arzentàt che riflèt 'na gran part de la lùce che 'l ciàpa, dür ma fàcil de laorà. L'è stat per tat tép el metàl piö car de töcc, endel 2008 a crumpàl ghe ülìa de piö de 10000 $ a l'óncia, che corespónt a 350$ al gram^[1]