Cresma

Quest articol chì l'è scrivud in lombard, con la Noeuva Ortografia Lombarda

La cresma o anca confermazzion a l'è un sacrament de la gesa catolega, ortodossa, ortodossa orientala e gesa anglicana che 'l marca el vegnì del Spirit Sant in su quei che vegnen cresmad, a travers del dà el crisma e de l'imposizzion di man, despess de un vescov o de un prevet de lu delegad. Anca di confession protestante la prateghen, però senza recognossegh el valor de sacrament, ma domà de rit che 'l mena a un cresser in la vita de fed, ma quelle evangeleghe de solet la prateghen no e la veden 'me anti-biblega.

A l'è ligad in manera intima al batesim: in del cristianesim ocidental che el pratega el pedobatesim a l'è dada quand che el fioeul el riva a l'età de la reson, inscì de confermà la soa fed, e per tradizzion la preced el prim comunegàss. In del cristianesim oriental, inveci, l'è dada subit dopo del batesim e quella roba chi l'è stada ciapada anca de la gesa catolega nazzional polaca, che la riva a tacà insema i du sacrament de la cresma e del batesim.

In la Gesa de Gesù Cristo di Sant di Darer Dì el batesim l'è dad quand che se riva a l'età de la reson e donca la confermazzion, ciamada ofizzialment batesim in del foeugh e in del Spirit Sant, l'è dada poch dopo de quell rit li, che l'è minga considerad debon fad fina a la confermazzion.

In l'ebraism reformad a gh'è una cerimonia compagna, ispirada a quella cristiana, e ligada a la festa de Shavuot.

• Cresima - DSS

• Wikiquote el gh'ha dent citazzion de o su Cresma
• Wikimedia Commons el gh'ha dent imagin o alter archivi su Cresma