Bibliotêca naçionâle de Frànsa

ZE
 Quésta pàgina a l'é scrîta in zenéize, segóndo a grafîa ofiçiâ
O lögo da BnF

A Bibliotêca naçionâle de Frànsa (Bibliothèque nationale de France in françéize, BnF in sìgla), ciamâ coscì da-o 1994, a l'é a bibliotêca naçionâle da Repùbrica Françéize, inougoâ sott'a sto nómme chi a-i 30 de màrso do 1995 da-o Prescidénte da Repùbrica François Mitterrand. A l'é l'erêde de coleçioìn di Rè inandiæ da-i ténpi de l'Etæ de Mêzo e, a-a giornâ d'ancheu, a l'é o propietâio de unn-a de ciù rìcche arecugéite do móndo.

A misción da BnF a l'é quélla d'arechéugge, archiviâ e mantegnî (conservàndo e restaoràndo) màscime tùtto quéllo ch'o l'é stæto pubricòu ò stanpòu in Frànsa, ciù chò-u patrimònio ereditòu da âtre coleçioìn e òtegnûo inte di âtri mòddi (donaçioìn, làsciti, acàtti). A fà da riçèrca e da promoçión da conoscénsa ascì, màscime con l'inàndio de tànte móstre pò-u grànde pùbrico e de bén bén de manifestaçioìn colturâli, conferénse, convêgni e conçèrti, tànto inti seu locâli che in sciô seu scîto d'Internétte. A gestìsce 'na ræ de coperaçión con âtri servìççi docomentâi da Frànsa e a pìggia pàrte a vàrie fórme de coperaçión internaçionâle inte sto setô chi.

Stöia

A BnF a l'é stæta a prìmma instituçión, da-o 1537[1], a-arechéugge i depòxiti legâli e, a-a giornâ d'ancheu a l'é a ciù grànde bibliotêca de Frànsa e unn-a de ciù grénde a-o móndo. Da-o pónto de vìsta giurìdico a l'é consciderâ cómme 'n'instituçión pùbrica a caràtere aministratîvo (établissement public à caractère administratif). E seu ativitæ són spartîe tra sètte sêde, co-a ciù pàrte ch'a se trêuva inta bibliotêca François-Mitterrand, scitoâ into 13° arrondissement de Parìggi, in sciâ zìnn-a de mancìnn-a da Sénna. O cazaménto stòrico, ch'o remónta a-o Seiçénto e ch'o l'é arivòu a òcupâ 'n izolòu intrêgo, o se trêuva pe cóntra into 2° arrondissement de Parìggi, in corispondénsa do Palais Mazarin e de l'Hôtel Tubeuf, dónde do Sèteçénto se trovâva a Bórsa de Parìggi ascì. Pò-u sòlito o l'é ciamòu co-o nómme de "quadrilatère Richelieu", da-a stràdda dónde s'avànsa l'intrâ prinçipâ.

Òrganizaçión

O "site François-Mitterrand" a Parìggi, inougòu do 1995, formòu da quàttro tôre da-a fórma ch'a l'aregórda di lìbbri avèrti

A Bibliotêca naçionâle de Frànsa a l'é formâ da quatòrze dipartiménti e da vàrie coleçioìn, òspitæ pò-u ciù inte seu quàttro sêde a Parìggi, inclûzo o Département des monnaies, médailles et antiques, ch'o l'é l'erêde do Cabinet des Médailles. Ste coleçioìn chi són formæ da ciù ò mêno 150 milioìn de papê stanpæ e specializæ in tùtto.

Fêua de Parìggi, a BnF a l'é o propietâio da Maison Jean-Vilar d'Avignón e di doî çéntri ténichi de conservaçión de Bussy-Saint-Georges e de Sablé-sur-Sarthe. E seu coleçioìn arîvan a 15 milioìn de lìbbri e òpie a stànpa, ciù che di milioìn de periòdichi, pe 390.000 tìtoli in tùtto. Co-i seu 10.000 còdichi miniæ de l'Etæ de Mêzo a l'é a prìmma bibliotêca a-o móndo inte sto cànpo chi, ma a gh'à ascì tòsto 250.000 manoscrîti, màppe, stànpe, fotografîe, spartîi, monæe, medàgge, docoménti òudio, vìdeo, multimediâli, digitâli e informàtichi (pe 16,5 miliàrdi de URL), ògètti e òpie d'àrte, scenografîe e costùmmi, etc.

A bibliotêca a riçéive ciù de 70.000 lìbbri a l'ànno in depòxito legâle, insémme a ciù de 250.000 nùmeri de periòdichi e a migiæa de papê specialìstichi, ma a fà di acàtti e a riçéive de donaçioìn ascì. O depòxito legâle in sciâ Ræ o l'à conservòu squæxi 'n petabyte (PB) de dæti. A ciù pàrte de ste referénse chi a peu êse consurtâ in sciâ Ræ, into catàlogo generâle da BnF e inti seu catàloghi specialìstichi. A BnF a gh'à 'na bibliotêca digitâle bén conosciûa, a Gallica, ch'a permétte de consurtâ de lengê e riproduçioìn de ciù de 7.600.000 docoménti de tésto, inmàgine ò soìn[2]. O "site François-Mitterrand" o l'òspita l'Inathèque de France ascì, ch'a l'é o responsàbile do depòxito legâle de ràdio e televixón e ch'a consèrva 'na coleçión de pelìcole ascì.

O nómme "Bibliothèque nationale de France" o l'é quéllo de l'instituçión pùbrica, ch'a conprénde e sètte sêde. O nómme ofiçiâ da sêde de Tolbiac o l'é "site François-Mitterrand", asegnòu pe domànda do Prescidénte da Repùbrica Jacques Chirac, scibén ch'o no l'é de lóngo stæto o ciù comùn. Defæti, a-o mànco scìnn-a do 1999, o l'é de vòtte indicòu cómme "Très Grande Bibliothèque" (TGB)[3].

Nòtte

  1. ↑ (FR) Françésco I, Ordonnance royale du 28 décembre 1537, Montpellier.
  2. ↑ (FR) Gallica, in sce archive.wikiwix.com. URL consultòu o 28 òtôbre 2024.
  3. ↑ (FR) Affaires culturelles du Sénat: Audition de M. Jean-Pierre Angremy, président de la Bibliothèque nationale de France, mercredi 7 avril 1999, Senâto. URL consultòu o 28 òtôbre 2024.

Bibliografîa

  • (FR) Bruno Blasselle e Jacqueline Melet-Sanson, La Bibliothèque nationale de France, mémoire de l'avenir, Découvertes Gallimard / Histoire, Parìggi, Gallimard, 1990, ISBN 2-07-034341-3.
  • (FR) Bibliothèque nationale de France, Trésors de la Bibliothèque nationale de France, 2 vol., Parìggi, Bibliothèque nationale de France, 1996, ISBN 2-7177-1999-7.
  • (FR) Daniel Renoult e Jacqueline Melet-Sanson, La Bibliothèque nationale de France: collections, services, publics, Bibliothèques, Parìggi, Éd. du Cercle de la librairie, 2001, ISBN 2-7654-0820-3.
  • (FR) François Stasse, La Véritable Histoire de la grande bibliothèque, L'Épreuve des faits, Parìggi, Seuil, 2002, ISBN 2-02-051761-2.

Âtri progètti

Ligàmmi de fêua

Contròllo de outoritæVIAF (EN) 137156173 · ISNI (EN) 0000 0001 2353 1945 · SBN (IT) UFIV089469 · LCCN (EN) no95028191 · GND (DE) 5156217-0 · BNF (FR) cb12381002j (data) · BNE (ES) XX179415 (data) · ULAN (EN) 500309981 · NLA (EN) 35553176 · NDL (EN, JA) 00283813 · WorldCat Identities (EN) no95-028191