Artemisia Gentileschi

ZE	Quésta pàgina a l'é scrîta in léngoa zenéize A Grafîa adeuviâ a l'é quélla de l'Académia Ligùstica do Brénno

Artemisia Lomi Gentileschi (Romma, 8 lùggio 1593 - Napoli, 31 zenâ 1654) a l'é stæta 'na pitôa italiann-a de schêua caravagésca.

Artemisia Gentileschi

Simon Vouet, Ritræto d'Artemisia Gentileschi, 1623-1625

Dæti personâli

Nàscita: Rómma, 8 lùggio 1593
Mòrte: Nàpoli, post 31 zenâ 1654
Pàize: Italia

Âtre informaçioìn

Profesción: pitôa

Vìtta

L'Artemisia Gentileschi a l'é nasciûa a Rómma a-i 8 de lùggio do 1593, fìggia d'Oraçio e de Prudençia d'Ottavian Montoni, primogénita de sêi fìggi. L'Oraçio Gentileschi o l'êa 'n pitô manierìsta nasciûo a Pîza. A Rómma a sò pitûa a l'à agoantòu a sò çìmma esprescîva graçie a-e inovaçioìn do Caravaggio ch'o l'adotâva di modelli reali sensa idealizâli, trasfiguràndoli adreitûa inte di protagonìsti de realìstica dramatiçitæ.

Batezâ inta gêxa de San Loenso in Lucina, l'Artemisia a l'é diventâ òrfana de moæ into 1605. A s'é missa a dipinze graçie a-i stimoli de sò poæ. L'Oraçio o l'aiva mostròu a sò fìggia cómme preparâ i materiâli: a maxinaçion di coî, l'estraçion e a purificaçion di êui, a costruçión di penelli con pei d'animâ, a stezûa de téie e a polverizaçión di pigménti. L'Artemisia a s'é perfeçionâ, copiando de xilografìe, cómme quélle do Albrecht Dürer. A s'é ocupâ ascì da câza e di seu fræ ciù picìn.

A l'à studiòu a pittûa do Caravaggio, mascime i dipìnti da Capèlla Contarelli inta Gêxa de San Loîgi di Françeixi. Da-o 1608 a-o 1609 a l'à prinçipiòu a intervegnî inte òpie de so poæ e a l'à pituòu de teie de dimenscioin picinn-e. A-o realismo do Caravaggio a gh'azonzeva i sugerimenti da Schêua bologneize, in particolâ de l'Annibale Carracci.

L'Oraçio o l'à scrîto a-a granducchessa de Toscànn-a, a-i 3 de lùggio 1612, 'n-a lêtia inta quæ o löda a fìggia:^[1]

«Sta femina, comm'é piaxûo a-o Segnô, avendola adrisâ inta profescion da pitûa in tréi anni a s'é tanto inpratichîa che pòsso dî, sensa dubio, che a-a giornâ d'anchêu no ghe ne segge unn-a comme lê, dæto ch'a l'à fæto de òpie che fìn’òua, fòscia, i ciù inportanti méistri de sta profescion i no l'arivan a-o sò savéi.»

(Òriginâle: Questa femina, come è piaciuto a Dio, avendola drizzata nelle professione della pittura in tre anni si è talmente appraticata che posso adir de dire che hoggi non ci sia pare a lei, havendo per sin adesso fatte opere che forse i prencipali maestri di questa professione non arrivano al suo sapere)

A pitôa a l'a desciou l'amiraçión do Zane Baglione, o quæ o l'a scrîto:^[2]

«Lê o l'à lasciòu di figgi, e 'na figgia, nominâ Artemisia, a-a quæ lê o l'à inparòu i artifìççi da pitûa, e inte 'n mòddo particolâ l'artifiçio de ritrâe da-o naturâle, sciché 'na bonn-a riêscîa lê a l'à fæto, e ben ben a s'è portâ.»

(Òriginâle: Lasciò egli figliuoli, ed una femmina, Artemisia nominata, alla quale egli imparò gli artificj della pintura, e particolarmente di ritrarre dal naturale, sicché buona riuscita ella fece, e molto bene portossi.)

O stùppro

L'Oraçio into 1611 o l'a mìsso l'Artemisia sótta a goìdda de l'Aostin Tassi, un virtôzo da prospetìva into trompe-l'œil (leteralmente: inganâ l'éuggio), co-o quæ a colabora a-a lögetta da sâla do Casin de Mûze, a-o Palasso Pravexin Rospigliosi.

O Tassi o l'à violentòu l'Artemisia, into 1611. Quésto tràgico fæto o l'a influensòu in mòddo dramàtico a vìtta de l'Artemisia Gentileschi. O stùppro o l'é acheito inte l'abitaçión da Gentileschi, inta Via della Croce (Stràdda da Crôxe), co-a compiaxença do Coximo Quorli, furê da Càmia apostòlica, e da Tuzia, 'na vexinn-a de casa che, in asénsa de l'Oraçio, a l'acudîva a zòvena.

O procèsso

O Tassi o l'a proposto a l'Artemisia de maiâla, pe remediâ a-o dizönô. L'Artemisia a l'a cedûo donca a-e luxinghe e intrategnûo di rapòrti ìntimi con lê, inta sperança do maiézzo. L'Oraçio o l'a ascôzo a vicénda, ma into màrso 1612 l'Artemisia a l'a descovèrto che o Tassi o l'êa za maiòu. L'Oraçio o l'a scrîto unn-a querêla a pàppa Paolo V, p'âcuzâ o Tassi d'avéi stupròu sò fìggia, ch'a l'à afrontòu o procèsso con coraggio, anche perché l'attivitæ giudiçiaia a l'é stæta compromìssa da fâsci testimònni.

L'Artemisia a l'é stæta òbligâ a de vixite ginecològiche, davànti a 'n scrivàn ch'o rediggeva o verbâle e sotopòsta a l'interogatöio, sótta tortûa. O supliçio o l'é stæto «dei sibilli», e o conscisteiva inte l'açion de ligâ i dîi gròsci con de cordétte che, con l'açion de 'n bàcco, se strenzeiva, fìn a tritolâ e mandâ in menìssi e falangi: L'Artemisia a l'à arezegòu de pérde i dîi, ma a no l'à ritratòu a sò dépoxiçion.

L'Aostin Tassi o l'è stæto condanòu pe «sverginamento» a 'na sançión pecuniaia e a çìnque ànni de recluxón ò, in alternatîva, a l'exìlio perpétoo da Rómma. Lê o l'a çernûo l'exilio, ma o non s'é mâi spostòu da Rómma. A Gentileschi a l'a guagnòu o procèsso de iure, ma a sò ònorabilitæ a Rómma a l'êa minâ.

A Firénse

A-i 29 de novénbre do 1612 l'Artemisia Gentileschi a l'à maiòu o Pierantonio Stiattesi, 'n pitô pöco avoxòu. E nòsse, celebræ inta gêxa do Santo Spirito in Sassia, son stæte organizæ da l'Oraçio, pe restitoî a-a sò fìggia 'n status de ònorabilitæ. L'Artemisia e o sò spozòu se son trasferîi a Firénse.

O grandùcca Coximo II de' Medici o ghe piaxéiva a pitûa, a mûxica, a poêxîa, a scensa e o l'amâva o naturalìsmo caravaggèsco. L'Artemisia Gentileschi a l'é stæta introdûta a córte da-o barba Aurelio Lomi, fræ de l'Oraçio.^[3] A l'à incontròu de persónn-e inportànti, comme o Galileo Galilei, co-o quæ a l'a avûo 'na corispondénsa epistolàre, e o Michelangelo Buonarroti o Zôve, ch'o gh'à dæto de comitençe. L'Artemisia a l'à dipìnto l'Alegorîa de l'Inclinaçión, 'n'òpera pe comitença do Buonarroti, pe-o prêxo de trentequattro fiorìn. A-i 19 de lùggio do 1616 a l'é stæta amìssa a l'Académia do Diségno de Firénse: a l'é stæta a prìmma dònna a avéi questo privilêgio.

O Pierantonio Stiattesi o l'êa 'n catîo gestô do patrimònio familiâre e o l'a amugiòu di débiti. L'Artemisia a l'à domandòu agiùtto a-o Coximo II de' Medici. Da o maiézzo son nasciûi o Gioàn Batìsta, o Cristoffa (8 novénbre 1615), a Prudençia (ò Palmira, 1º agósto 1617) e a Lisabèlla (13 seténbre-òtôbre 1618 - 9 zùgno 1619).

A Rómma, a Venéçia e a Nàpoli

L'Artemisia, ch'a l'aiva 'na relaçión clandestìnn-a co-o Françesco Maria Maringhi, pe-o scàndalo a l'è stæta costreita a lasciâ Firénse. Into 1621 a l'êa con sò poæ Oraçio a Zêna, dove a l'à conosciûo o Van Dick e o Rubens.^[4] Into 1922 a l'êa a Rómma, inta stradda do Corso (Via del Corso). A l'a dipìnto o Ritræto de confaonê, datòu 1622. L'Artemisia a l'a avûo di contàtti co-o Scimon Vouet, co-o Mascimo Stanzione, e co-o Giöxeppe de Ribera. A l'a dipìnto ancón Giuditta co-a seu ancèlla e Olofèrne.

Da-o 1627 a-o 1630 a s'è trasferîa a Venéçia e inta stæ do 1630 a s'è recâ a Nàpoli, dov'a l'é restâ pe-o rèsto da seu vìtta, se non che pe 'na parentexi a Londra. A g'aiva di boìn rapòrti co-o viceré, o Ducca d'Alcalá, e co-o Mascimo Stanzione. A Nàpoli a l'a dipìnto træ teie pe-a Catedrâle de Poçeu: San Zenâ inte l'anfitiâtro de Poçeu, Adoraçion di Mâgi e Santi Procolo e Nicea. A l'a dipìnto ancon a Nàscita de San Gioàn Batìsta Museo del Prado e a l'a avûo de comitençe da-o Féipo IV de Spàgna.

Into 1638 l'Artemisia a s'è recâ a Londra, a-a córte do Carlo I d'Inghiltæra. A Lóndra l'Oraçio Gentileschi o l'êa pitô de córte e o decorava 'na sofita (Trionfo da Paxe e de Arte) inta Casa de Delìçie da reginn-a Enrichetta Maria de Borbon-França, a Greenwich. O Carlo I o l'a acquistòu l'Autoritræto - Alegorîa da Pitûa.

Into 1649 l'Artemisia a l'êa a Nàpoli, in corrispondensa co-o colleçionista Antogno Ruffo de Sicilia. A l'à dipìnto Susanna e i vêgi (a Brno) e Madònna co-o Bambìn e rosàio , ch'a s'atrêuva a El Escorial. L'Artemisia a l'é stæta asoterâ a Nàpoli, da-arente a-a gêxa de San Gioan Batista di Fiorentin (Nàpoli).

Mostre

• 2001-2001: I Gentileschi, Roma-New York-Saint Louis^[5]
• 2011-2012: Artemisia Gentileschi: a stöia da pascion (the story of a passion) Milàn, Palasso Reale (Milan)^[6]
• 2013: Violença e virtù : Violence & virtue: "A Giuditta a l'amàssa l'Oliferne" de l'Artemisia Gentileschi ("Judith slaying Holofernes"), Chicago-New Haven-Londra^[7]

Galerîa de òpie

• 
  Giuditta co-a seu ancèlla e Olofèrne,1614-1620, Firénse, Palasso Pitti^[8]
• 
  Ritræto de confaonê, 1622, Bologna, Palasso d'Accursio
• 
  Santa Catænn-a, 1635 ca. Stoccolma, Nationalmuseum
• 
  San Zenâ inte l'anfitiâtro de Pozzuoli, 1636-1637 Catedrâle de Pozzuoli
• 
  Aotoritræto - Alegorîa da Pitûa, 1638-1639, Royal Collection
• 
  Susanna e i vêgi, 1649, Brno, Moravian Gallery

Nòtte

1. Gianni Colosio, L'annunciazione nella pittura italiana da Giotto a Tiepolo, Teseo, 2002, p. 632.
2. Giovanni Baglione, Le vite de' pittori, scultori, architetti, ed intagliatori, dal pontificato di Gregorio XIII del 1572, sino a 'tempi di papa Urbano VIII nel 1642. Con la vita di Salvator Rosa, napoletano pittore, e poeta scritta da Gio. Batista Passari, nuovamente aggiunta, 1733, p. 245.
3. Lomi o l'ea o vêo cognómme d'Oraçio.
4. O viâgio a Zêna o no l'è confermou da di documénti çèrti.
5. Oraçio e Artemisia Gentileschi / a cura di Keith Christiansen e Judith W. Mann, Milàn, Skira, 2001.
6. Artemisia Gentileschi: Storia di una passione / a cura di Roberto Contini e Francesco Solinas, Pero, 24 ore cultura, 2011.
7. Eve Straussman-Pflanzer, Violence & virtue: Artemisia Gentileschi's "Judith slaying Holofernes"; the exhibition was presented at the Art Institute of Chicago from October 17, 2013 to January 9, 2014, Chicago, Art Institute of Chicago; New Haven; London, Yale University Press, 2013.
8. Fìrma, into bàsso, a drîta: ERGO ARTEMITIA LOMI FEC.

Bibliografìa

• Atti di un processo per stupro: Artemisia Gentileschi, Agostino Tassi / a cura di Eva Menzio, Milàn, Edizioni delle donne, 1981.
• Francesca Torres, Tiziana Agnati, Artemisia Gentileschi: la pittura della passione, Milàn, Selene, 1998.
• Oraçio e Artemisia Gentileschi alla Galleria Spada: padre e figlia a confronto / A cura di! Maria Lucrezia Vicini, Romma, Ministero per i beni e le attività culturali, Soprintendenza per i beni artistici e storici di Roma-Galleria Spada, 2000.
• Tiziana Agnati, Artemisia Gentileschi, Firénse-Milàn, Giunti, 2001.
• Luciano Berti, Graziella Magherini, Monica Toraldo di Francia, Artemisia Gentileschi nostra contemporanea, Firénse, Nicomp L. E., 2002.
• Giansisto Gasparini: cinquanta disegni per Artemisia Gentileschi, Mantova, Arianna Sartori, 2002.
• Roberto Longhi, Gentileschi padre e figlia; con uno scritto di Mina Gregori, Milàn, Abscondita, 2011.
• Una donna per l'arte: Artemisia Gentileschi: ospite nelle stanze della regina, Quarto (NA), Iniziative Editoriali, 2012.
• Maurizia Tazartes, Artemisia: tintora romana, Livorno, Sillabe, 2013.
• Giuseppe Porzio, Maria Cristina Terzaghi, Artemisia Gentileschi: Cleopatra, Pariggi, Galerie G. Sarti, 2014.
• Artemisia Gentileschi / presentazione di Pietrangelo Buttafuoco, Milàn, Skira, 2016.
• Artremisia Gentileschi, Carteggio=Correspondance; introduction, traduction et notes de Adelin Charles Fiorato; préface, édition critique et notes de Francesco Solinas, Parggi, Les belles lettres, 2016.
• Artemisia Gentileschi e il suo tempo, Milàn, Skira-Arthemisia Group, 2016.
• Alessandro Grassi, Artemisia Gentileschi, Ospedaletto (PI), Pacini, 2017.
• Tiziana Agnati, Artemisia Gentileschi: 1593-1652; con un'introduzione di Philippe Daverio, Milàn, Corriere della Sera-La Gazzetta dello Sport, 2017.
• Raoul Melotto, Artemisia Gentileschi: l'artista in Italia, Çitæ de Castello, Odoya, 2019.

Conlegiménti esterni

Altri progetti

• Wikimedia Commons

• Wikimedia Commons a contêgne di files in sce Artemisia Gentileschi

Contròllo de outoritæ	VIAF (EN) 309780277 · ISNI (EN) 0000 0001 1776 6721 · SBN (IT) BVEV000316 · Europeana (EN) agent/base/150308 · LCCN (EN) n87102497 · GND (DE) 118936794 · BNF (FR) cb12016677b (data) · BNE (ES) XX1123426 (data) · ULAN (EN) 500011658 · BAV (EN, IT) 495/68632 · CERL cnp00542807 · WorldCat Identities (EN) n87-102497