Reggae

Reggae

Bob Marley
Ensampel a	eghen a ilewydh
Klass	ilewydh Jamayka
Gwlas	Jameka
Dalleth/Fondya	1961
Restrennow kelmys war Gemmyn Wikimedia

Reggae ew ehen a vusek a dheuth a Jamayka e'n 1960ow diwedhes. Usys ew an term ewedh rag kampolla musek gerysda arnowydh Jamayka ha'y diaspora. Sengel gen Toots and the Maytals, "Do the Reggay" en 1968 o an gan gensa dhe usya an ger "reggae", ow henwel an ehen ha'y gomendya dhe bobel an bes. Rag bos kewar poran, reggae ew ehen a vusek delenwys gen mento hengovek, jazz amerikanek ha 'resyas ha hireth' (rhythm and blues), hag esblegys dhort an ehednow kens a ska ha rocksteady.

Dell ew usys, testednow kanow reggae ew nowodhow, kyhwedhlow ha kampollow politek. Aswonys ew en es drefen an gorthboynt tredh isbols an gitar faborden ha'n tabour, ha'n radn rythym treusakenek. Ma dhe'n musek chops rewlys war an dreusaken (gelwys "skank”) gwariys gen gitarydh rythym. An tabour faborden a skwatt war an nessa ha peswora pols e'n barr (gelwys an “drop”). Dalleth reggae o en ska ha rocksteady, ha dhort an diwettha reggae a gawas devnydh an gitar faborden avel daffar frappyans.

Ma kevren ogas tredh reggae ha Rastafari, kryjyans Afrokresek a dhisplegyas en Jamayka e'n 1930ow, ow skoodhya Pan-Afrikanieth. Woja devedhyans reggae, Rastafarieth ewedh a dheuth moy gerysda en ollvesek. Kebmyn ew kanoryon reggae dhe usya Sowsnek Jamayka po radnyeth Jamayka en aga hanow, gen niver a eryow/themow dhort Rastafari, pekar ha Babylon, sinsemilla/ganja (kanabys ew sakrys dhe holyoryon an kryjyans), Jah (Duw) ha kethneth. Bettegens, kenys ew reggae en lies tavas, ow komprehendya Kembrek (Geraint Jarman ha'n Cynganeddwyr), Wordhonek (Breag), Rewenysek (Hjálmar) ha Kernewek (Bagas Degol).

Erbydn hedhyw ema lies versyon a reggae, ow komprehendya:

• Reggae Roots - gwres meurgerys gen artydhyon pekar ha Bob Marley and the Wailers ha Peter Tosh, an geryow a wra mencyon a dybyansow Rastafari a 'Dhehweles dhe Afrika', komparya kethneth ha trevesigoleth dhe gethneth biblek en Babylon, ha kryjans en udn Duw (Jah) diskwedhys en person Emperour Haile Selassie a Ethiopi.
• Dub - ehen a reggae a wra devnydh a eylkemyska darnow a ganow erel gen moy a boslev war an gitar faborden ha tabour. Sly ha Robbie, Mikey Dread hag Augustus Pablo o posek e'n ehen ma.
• Rokk karoryon/Lover's Rock - an kanow a wra ,mencyon a gerenja. E teuth an ehen ma dhort Loundres e'n 1970ow gen artydhyon pekar ha Janet Kay.
• Hip Hop - toasting, hebm ew kewsel dres an musek a veu devisys gen DJow en Jamayka e'n 1950ow. Pan eth DJ a Jamayka (Kool Herc) dhe Evrek Nowydh e'n 1960ow diwedhes, hebm a ledyas dhe dhisplegyans hip hop gen Amerikanyon.
• Dancehall - displegys gen artydhyon pekar ha Yellowman hag erel. An geryow o pur reydhek ha freydhek. Raggamuffin o versyon elektronek a'n ehen ma.
• Reggaeton - ew versyon o reggae a gemyskas reggae hengovek ha musek Latin-Amerikanek.

• 
  An bagas sowsnek, UB40
• 
  Toots and the Maytals
• 
  Sly Dunbar a Sly ha Robbie
• 
  Yellowman
• 
  Kool Herc
• 
  Geraint Jarman

Ma an erthygel ma usya an Furv Skrifys Savonek a-barth Kernowek diwedhes.

Onan a'n mil erthygel posekka war Wikipedya yw an erthygel ma.