ვეჯინის ხევი, ვეჯინი — ხეობა სოფელ გლდანის დასავლეთით, მდინარე გლდანისხევს ერთვის მარჯვნიდან. მოიცავს ტერიტორიას ჯოხტნის-ხევიდან დიდველის მთამდე. ადგილობრივ მცხოვრებთა გადმოცემით, აქედან აყრილი მოსახლეობა კახეთის სოფელ ვეჯინში ჩასახლებულა.
შემონახული ძეგლების მიხედვით ვეჯინის ხევის ტერიტორია უკვე ადრინდელი შუა საუკუნეებში ინტენსიურად ყოფილა დასახლებული. ხეობის დასაწყისიდან 1 კმ-ზე, მთის ფერდობზე, შემორჩენილია VIII-IX საუკუნეების სასახლის კომპლექსის და ეკლესიების ნანგრევები. კომპლექსის სასახლის ოთახების კედლები შიგნიდან თლილი ქვით ყოფილა მოპირკეთებული. კედელში ზოგან დატანებულია წყალსადენის კერამიკული მასალები. სასახლის ჩრდილო-აღმოსავლეთით ასიოდე ნაბიჯზე აღმართულია იმავე ხანის პატარა ეკლესია, ხოლო ცოტა მოშორებით, ტყეში, კიდევ ორი პატარა ეკლესიაა, რომლებიც სასახლის კომპლექსს ენათესავება (კედლის წყობით, სამშენებლო ხერხებით, არქიტექტურული ფორმებით).
ლიტერატურა
