Himbrimi (fræðiheiti: Gavia immer) er að mestu staðfugl á íslandi. Nafnið brúsi er notað um himbrima í Þingeyjarsýslu.[1] Sumarstofnstærð er um 300 pör en vetrarstofnstærð milli 100 til 1000 fuglar. Himbrimi er Norður-Amerískur vatnafugl og er Ísland eina landið í Evrópu þar sem hann verpir að staðaldri. Hann verpir við hálendisvötn á Íslandi. Hann gerir sér hreiður í laut fremst á vatnsbakka og eggin eru yfirleitt eitt til tvö. Lifir á fiski. Hann er á válista því stofninn telur færri en 1000 fugla
Hann gefur frá sér langdregið væl, tryllingslegan hlátur og skemmtilegt jóðl sem hefur unnið honum sess í íslenskum þjóðsögum.
Danska líffræðingnum Morten Thrane Brünnich er eignað að hafa fyrst lýst fuglinum 1764 og valdi honum nafnið colymbus immer í riti sínu Ornithologia Borealis. Colymbus-flokkunin hefur verið lögð til hliðar en immer er norska fyrir himbrima og sama orðið orðsifjafræðilega séð.
