Denver esas chef-urbo di UsanastatoKolorado, e la sola urbo dil samnoma komtio. Segun la demografiala kontado di 2020 ol havis 715 522 habitanti, kontre 600 158 habitanti en 2010 (kresko di 19,2% en 10 yari. Lua tota surfaco esas 400,74 km², equivalanta a 154,73 mi², di qui 396,4 km² (153,07 mi²) esas lando e la cetera esas aquo.
La reliefo di Denver esas plana an lua central areo e kolinoza norde, weste e sude. Lua mezavalora altitudo esas 1610 metri, e lua maxim alta punto jacas 1730 metri super la marala nivelo.
La klimato di Denver esas miarida kontinentala (BSk segun la klimatala klasifikuro da Köppen). Pro l'altitudo e la sikeso, la vario di la temperaturo diala esas multe granda. La mezavalora temperaturo en decembro (vintro) esas 6,7°C, kontre ke la mezavalora temperaturo en julio (somero) esas 32,2°C. La minima temperaturo ulafoye enrejistrita esis -34°C, ye la 9ma di januaro 1875, kontre ke la maxima temperaturo ulafoye enrejistrita esis 41°C, ye la 23ma di junio 2018. Ordinare, l'urbo recevas 3100 hori di sunala lumo omnayare.
La mezavalora yarala pluvo-quanto dil urbo esas 401 mm, e la maxim pluvoza monato esas mayo, kun mezavalore 67 mm. Nivo ofte falas de la fino di autuno til la komenco di printempo (mezavalore 102,7 centimetri omnayare). Tamen, en 2021 nula nivo falis en la urbo.
