Danaw Danao (Leyte)

Danaw Danao
Danaw Danao Lokasion iti kaunegan ti Filipinas
Lokasion	Leyte
Nagsasabtan	11°4′16″N 124°41′38″ENagsasabtan: 11°4′16″N 124°41′38″E
Pagpagilian ti labneng	Filipinas
Kalawa ti rabaw	148 ha (370 acre)
Agpakatengnga a kaadalem	80 m (260 ft)
Kangato ti rabaw	650 m (2,130 ft)
Dagiti pagtaengan	Ormoc

Ti Danaw Danao ket ti maysa nga agsukog iti gitara a danaw iti isla ti Leyte iti Filipinas.

Ti danaw ket sakupenna ti kalawa iti 148 ektaria (370 acre). Daytoy ket mabirukan iti 2,193 ektaria (5,420 acre) a Masna a Parke ti Danaw Danao, a mangiraman pay ti kabambantayan ti Amandiwin. Ti danaw ket 18 kilometro (11 mi) iti amianan a daya ti Siudad ti Ormoc, kagudua nga oras a panagmaneho iti igid dagiti kalsada ti San Pablo – Tongonan ken Milagro – Danaw Danao.

Daytoy ket kasisigud a nanaganan iti Danaw Imelda ken nairangarang a kas nailian a parke idi Hunio 2, 1972 babaen ti birtud ti presidensial a memorandum nga impaay babaen ni Presidente Ferdinand Marcos. Kalpasanna nanaganan manen daytoy ken nairangarang a kas Nailian a Parke ti Danaw Danao idi Penrero 3, 1998 babaen ti Proklamasion Blng. 1155 ken nasalakniban itan babaen ti Tignay ti Republika Blng. 7586 nga ammo kas ti National Integrated Protected Area System (NIPAS) Act of 1992.^[1] Mangipaay ti danaw iti mainum a danum kadagtii saan a basbassit ngem pito nga ili iti Akindaya a Leyte a mairaman ti Siudad ti Tacloban^[2] ken kas taudan pay a panagsibog para kadagiti talon ti bagas kadagiti ili a kas ti Dagami, Burauen, Pastrana ken Tabontabon.

Iti 650 metro (2,130 ft) a ngato ti pantar ti baybay, ti Danaw Danao ket mabirukan iti kangato a kapada ti Tagaytay, a makaaramid daytoy a nalamlamiis a lugar ngem ti agpakatengnga a temperatura iti Filipinas.

Taudan

Ti danaw ket bulkaniko iti tinaudan ken mabalin a maysa a graben wenno lennek a pinataud babaen ti Tukki ti Filipinas (wenno Tukki ti Tengnga a Leyte), ti maysa nga aktibo a tukki a mangballasiw iti lugar ti danaw iti turong nga amianan-abagatan. Dagiti pormasion ti bato kadagiti mangpalikmut a bantay ket mairaman dagiti andesitiko a bulkaniko a bato iti taudan a Kuaternario iti akinlaud a bangir, andesitiko ken dasitiko a bulkaniko iti taudan a Mioseno iti paset nga abagatan-akindaya, ken dagiti agpakatengnga a bulkaniko a sedimento iti taudan a Kuaternario iti amianan -akindaya a bangir ti danaw.^[1] Adda dagiti kalugnakan a mabirukan iti asideg ti danaw. Ti agdama a danaw ket mabalin a ti kaadaleman a paset ti dakdakkel a danaw iti napalabas. Daytoy ket mabalin a dakdakkel iti heolohiko a napalabas ken mabalin a manginayon kadagiti dakkel a kalugnakan. Ti sedimentasion ket mabalin a nangbaliw daytoy a paset iti danaw iti kastoy a langana ita nga aldaw.

Dagiti pangta

Dagiti nadumaduma a sektor ti lokal a komunidad ke nagad-adalda iti danaw ken dagiti ekosistemana. Ti panaganup ket ti nangruna a pangta dagiti sebbangan ti avifaunal iti Masna a Parke ti Danaw Danao. Dagiti nangruna pakaammo ket mangipakita a dagiti agan-anup ket saan laeng a dagiti lokal nga agtataeng ngem adu pay kadagitoy ket agtaud kadagiti sabali a lugar. Dagiti billit ti kaaduan a maan-anupan ket dagiti kalaw, dagiti kalapati ken dagiti pagaw. Ti panagpukan ken panagpuor iti bakir para iti agrikultura ken di legado a panagtarikayo ket nakaited pay iti pannakaperdi dagiti dadduma a parte iti nasalakniban a lugar.^[1] Ti pannakaipatakder dagiti pagtaengan ti tao iti kaunegan ti parke ket maysa pay a nakaro a pangta. Adda payen dagiti nairehistro a di legado a pataengan iti kaunegan ti kaarrubayan ti danaw a nakaro a mangbaliw iti ekosistema.

Kitaen pay

• Listaan dagiti nasalakniban a lugar ti Filipinas

Dagiti nagibasaran

1. "Multi-Sectoral Watershed Planning in Lake Danao Natural Park Through Participatory Approaches" (PDF). ciifad.cornell.edu. Naala idi Marso 13, 2009.
2. Leyte Samar Daily Express Online Naiyarkibo 2018-11-08 iti Wayback Machine Naala idi Marso 13, 2009.

Dagiti akinruar a silpo

• Heograpiko a datos a mainaig iti Danaw Danao (Leyte) iti OpenStreetMap