Praga[1] (in checo: Praha) es le capital e le citate le plus grande del Republica Chec. Le castello de Praga in le quartiero Hradčany esseva fundate in le 9e seculo, e circum isto appareva un societate que se developpava rapidemente a Praga. Le urbe deveniva un importante nodo del commercio e assi se developpava a in un importante urbe cultural europee. Praga floresceva specialmente in le 14e e 16e seculo, quando le urbe esseva le capital del imperio germano-roman. In 1992 le centro historic de Praga deveniva parte del Patrimonio Mundial del UNESCO.
Inter le attractiones touristic de Praga es le Universitate de Carolo, fundate in 1348, le Ponte Carolo, le Museo National (Národní muzeum), le Placia de Václav (Václavské náměstí), plure ecclesias – i.a. le Ecclesia de Týn, ubi le famose astronomo danese Tycho Brahe es sepelite – e le placia in le quartiero ancian (Staré Město). Praga ha un grande e variate vita cultural que comprehende le compania theatral mundialmente cognoscite Laterna Magika, le annual festical musical "Le Primavera in Praga" e memorias super le famose autor del urbe, Franz Kafka.
Le presidente chec ha su residentia in le castello de Praga. Le parlamento, le governamento, le bursa e le banca national anque ha lor sedes in le capital. Le corte superior e le corte constitutional totevia es situate in Brno.
Characteristic pro Praga es le numerose turres e pinnaculos; in le initio del annos 1800 on calculava 103, hodie le cifra es assumite esser plus que 500.
Situation geographic
Praga es situate in le region de Bohemia in le centro del Republica Chec al ripas del fluvio Vltava. Le centro del urbe es situate circa 180 metros supra le mar.
Le urbe ha climate continental temperate. Le temperatura annual in media es 8 grados Celsius, variante ab -17 grados C a 35 grados C. Le majoritate del pluvia cade durante le estate.
