Le lingua creol haitian (kreyòl ayisyen), sovente appellate simplemente Creolo, es un lingua parlate in Haiti per circa 8,5 milliones de gente (estimation de 2005). Isto es quasi tote le population del pais. In addition, il ha circa 3,5 milliones de emigrantes creolophone in Canada, in le Statos Unite, in Francia, e in multe nationes caribe, specialmente le Republica Dominican, Cuba, e le Bahamas.
Le creolo haitian es un del duo linguas official de Haiti, con le francese. Es un creolo basate primarimente in francese, del qual proveni 90 per cento de su vocabulario. Contine etiam varie influentias, notabilemente del lingua indigena Taíno, de alcun linguas de Africa del West, del portugese e del espaniol. Le lingua ha duo dialectos distincte: le Fablas e le Plateau.
Le francese esseva le sol lingua litterari del pais desde su independentia in 1804 usque a 1961, quando Félix Morisseau-Leroy inter alteres effectuava le stato official del creolo, affirmate in le constitution national de 1987. Le uso del creolo in litteratura es rar sed cresce; Morissau es un del exemplos primari. Multe parlantes es trilingue, parlante creolo haitian, espaniol, e francese. Multe inseniantes, autores e activistas ha emphasate feritate e alphabetisation in creolo a partir del annos 1980. Hodie existe numerose jornales e programmas de radio e de television in creolo.
