Ֆարիդ Թուրաբ օղլու Ահմադով (ադրբ.՝ Fərid Turab oğlu Əhmədov, հուլիսի 14, 1979(1979-07-14), Բաքու, Ադրբեջանական ԽՍՀ, ԽՍՀՄ), 2024 թվականից Ադրբեջանի Հանրապետության արդարադատության նախարար[1], 2022-2024 թվականներին՝ Ադրբեջանի թվային զարգացման և տրանսպորտի փոխնախարար[2], 2021-2022 թվականներին՝ թվային զարգացման և տրանսպորտի նախարարի խորհրդական[3], 2015–2017 թվականներին Ադրբեջանի համալսարանի ռեկտոր[4], ՄԱԿ-ի մարդու իրավունքների կոմիտեի անդամ, իրավագիտության փիլիսոփայության դոկտոր։
Կենսագրություն
Ֆարիդ Ահմադովը ծնվել է 1979 թվականի հուլիսի 14-ին Բաքվում։ 1996 թվականին ավարտել է Բաքվի թիվ 43 միջնակարգ դպրոցը։
2000 թվականին Բաքվի պետական համալսարանի միջազգային իրավունքի ֆակուլտետում ստացել է բակալավրի, իսկ 2002 թվականին՝ մագիստրոսի աստիճան։
2002-2003 թվականներին Մեծ Բրիտանիայի Էսեքսի համալսարանում ստացել է միջազգային իրավունքի մագիստրոսի աստիճան։ Այնտեղ Ահմադովը կրթությունն ստացել է «British Chevening» կրթաթոշակով։
2004 թվականին դարձել է Փիլիսոփայության և իրավունքի ինստիտուտի ասպիրանտ, իսկ 2009 թվականին՝ Ադրբեջանի նախագահին առընթեր բարձրագույն ատեստավորման հանձնաժողովի որոշմամբ շնորհվել է իրավագիտության փիլիսոփայության դոկտորի գիտական աստիճան։
2016 թվականին Օքսֆորդի համալսարանում ստացել է իրավագիտության դոկտորի կոչում։
2021 թվականին աշխատել է որպես թվային զարգացման և տրանսպորտի նախարարի խորհրդական, իսկ 2022 թվականին՝ թվային զարգացման և տրանսպորտի նախարարի տեղակալ։
2024 թվականի փետրվարի 27-ին նշանակվել է Ադրբեջանի արդարադատության նախարար։
Ծանոթագրություններ
