* Մասնագիտական կարիերայում ընդգրկված են միայն առաջնության խաղերը և գոլերը:
Ռուբեն Ռայոս Սեռնա (իսպ.՝ Rubén Rayos, առավել հայտնի է որպես Ռայո, հունիսի 21, 1986(1986-06-21)[1][2][3], Էլչե, Ալիկանտե, Վալենսիա, Իսպանիա), իսպանացի պրոֆեսիոնալ ֆուտբոլիստ, Կիպրոսի «Անորտոսիս» ակումբի հարձակողական ոճի կիսապաշտպան։
Ֆուտբոլային կարիերա
Ռայոն ծնվել է Էլչեում (Վալենսիա)։ Հարազատ քաղաքի համանուն ակումբի սան է և մինչև 25 տարեկանը խաղացել է միայն Սեգունդա Բ-ում՝ աջորդաբար հանդես գալով «Վիլյահոյոսա», «Բարսելոնա Բ»[4], «Օրուելա»[5] և «Լերիդա»[6] ակումբներում։
2011 թվականի ամռանը Ռայոն տեղափոխվել է Հունաստանի Սուպերլիգայի «Աստերաս Տրիպոլիս» ակումբ, որտեղ արդեն հանդես էին գալիս նրա մի քանի հայրենակիցներ։ Նոր ակումբի կազմում անցկացրած իր առաջին մրցաշրջանում Ռայոն խփել է հինգ գոլ առաջնությունում և երեք գոլ գավաթի խաղարկությունում։
2012/13 մրցաշրջանում Ռայոն լավացրել է իր ցուցանիշները՝ խփելով ինը գոլ և կատարելով 12 գոլային փոխանցում։ Հունաստանի գավաթի խաղարկության եզրափակչում՝ «Օլիմպիակոս» ակումբի դեմ խաղում, Ռայոն բացել է հանդիպման հաշիվը, սակայն վերջնական արդյունքում նրա թիմն ավելացված ժամանակում պարտվել է 1:3 հաշվով[7]։ Արդյունքում նա ճանաչվելէ մրցաշրջանի լավագույն լեգեոներ[8]։ Հունաստանում անցկացրած իր կարիերայի մեծ մասի ընթացքում նա եղել է «Աստերասի» ավագ։
2013 թվականի հունիսի 6-ին Ռայոն երեք տարով պայմանագիր է կնքել «Մաքաբի Հայֆա» ակումբի հետ։ Առաջին մրցաշրջանում նա 27 հանդիպումների ընթացքում խփել է 11 գոլ և իր թիմին օգնել զբաղեցնել չորրորդ տեղն Իսրայելի Պրեմիեր լիգայում[9]։ Սակայն 2014 թվականի մարտին «Բնեյ Իեհուդա» ակումբի խաղացող Ռաֆի Դաանին հետ բախման ընթացքում Ռայոն հակառակորդին հասցրել է առջևի խաչաձև ջլի վնասվածք, որի պատճառով նա չի կարողացել խաղալ մեկ տարի։ Այդ դեպքի համար Ռայոն ստացել է կարմիր քարտ[10][11], իսկ Դաանն այդպես էլ չի կարողացել ապաքինվել և ստիպված է եղել ավարտել կարիերան[12]։
2015 թվականի հուլիսի 8-ին Ռայոն տեղափոխվել է ֆրանսիական «Սոշո» ակումբ՝ կնքելով երկու տարվա պայմանագիր (գումարը չի հրապարակվել)[13]։ Մեկ տարի անց նա տեղափոխվել է Կիպրոսի առաջնության «Անորտոսիս» ակումբ[14]։
Ձեռքբերումներ
Թիմային
«Աստերաս Տրիպոլիս»
Հունաստանի գավաթի խաղարկության եզրափակչի մասնակից – 2012/13
Անհատական
Հունաստանի առաջնության լավագույն լեգեոներ – 2012/13
