Հայաստանի ֆուտբոլի ֆեդերացիա

Հայաստանի ֆուտբոլի ֆեդերացիա Հայաստանի ֆուտբոլի ֆեդերացիա
Երկիր	Հայաստան
Հիմնված	հունվարի 18, 1992
Շտաբ	Երևան
ՖԻՖԱ-ի անդամ	հուլիսի 3, 1992
Նախագահ	Արմեն Մելիքբեկյան
Կայք	ffa.am

Հայաստանի ֆուտբոլի ֆեդերացիան (ՀՖՖ), հայկական ֆուտբոլը կառավարող մարմին։ Հիմնադրվել է 1992 թ. հունվարի 18-ին։ ՖԻՖԱ-ի անդամ է 1992 թ. հուլիսի 3-ից, ՈՒԵՖԱ-ի լիիրավ անդամ՝ 1993 թ. հունվարի 17-ից։ Ֆեդերացիայի նախագահը Արմեն Մելիքբեկյանն է։

ՀՖՖ-ի գործառույթներ

Հայաստանի ֆուտբոլի ֆեդերացիայի նախկին զինանշան:

ՀՖՖ-ի հիմնական խնդիրներն են երկրում ֆուտբոլի տարածումը, զարգացումը, զանգվածային և մանկապատանեկան ֆուտբոլի կազմակերպման ապահովումը, ֆուտբոլիստների վարպետության բարձրացումը, մրցավարների, մարզիչների, մարզիկների բարոյական բարձր հատկանիշների դաստիարակումը, հանրապետության մրցումների կազմակերպումն ու անցկացումը, այդ համակարգերի կատարելագործումը, հայրենական ֆուտբոլի նյութատեխնիկական բազայի զարգացմանը նպաստելը։

ՀՖՖ-ն մշակում է հանրապետությունում ֆուտբոլի զարգացման ընթացիկ և հեռանկարային ծրագրեր, կազմակերպում հանրապետության հավաքական թիմերի նախապատրաստումը միջազգային տարբեր մրցումների։ ՀՖՖ-ն միավորում է մարզային ֆեդերացիաները, ֆուտբոլի ակումբները, մարզադպրոցները, մարզակենտրոնները, բաժանմունքները, համագործակցում է Հայաստանի սպորտի և երիտասարդության հարցերի նախարարության հետ։

ՀՖՖ մարմիններ

ՀՖՖ բարձրագույն մարմինը համագումարն է, որը 4 տարով ընտրում է նախագահ և գործադիր կոմիտեի անդամներ։

Աշխատանքային մարմինը գործկոմն է։ Հրատապ խնդիրներ լուծելու համար ստեղծվել է գործկոմի բյուրո։ Ֆուտբոլի զարգացման հարցերի կարգավորման, ընդունված որոշումների կատարման ընթացքը հսկելու, գործկոմին առաջարկներ ներկայացնելու համար ստեղծվել են բաժիններ (զանգվածային, մրցավարական, պատանեկան, միջազգային կապեր և այլն)։ Ֆեդերացիայում գործում է բաժանմունք, որի գործունեությունը նպատակաուղղված է կանանց ֆուտբոլին^[1]։

Մրցանակներ

2023 թվականի մայիսին Հայաստանի ֆուտբոլի ֆեդերացիան ստացել է FIFA FORWARD Awards 2023 մրցանակը փոքր դաշտերի նախագծերի համար։ ՖԻՖԱ-ի՝ մասսայական ֆուտբոլի միջտարածաշրջանային ենթակառուցվածքների զարգացման ծրագրի շրջանակներում ներկայացված էին երկրի տարբեր մարզերի 89 փոքր դաշտերը^[2]։

ՀՖՖ նախագահներ

• Նիկոլայ Ղազարյան (1992-1994)
• Արմենակ Սարգսյան (1994-1998)
• Սուրեն Աբրահամյան (1998-2002)
• Ռուբեն Հայրապետյան (2002-2018)^[3]
• Արթուր Վանեցյան (2018-2019)
• Արմեն Մելիքբեկյան (2019-)

Աղբյուրներ

1. Սամսոն Հակոբյան (2009). Ֆուտբոլ. Երևան: «Էդիթ Պրինտ». էջ 6-7.
2. «Федерация футбола Армении стала лауреатом премии FIFA Forward Awards 2023» (ռուսերեն). АМИ «Новости-Армения» — новость. Վերցված է 2023 թ․ հուլիսի 6-ին.
3. Ռ. Շառոյան, Ա. Բաբայան, Գ. Եղիազարյան (2005). Ֆուտբոլի հանրագիտարան. Երևան: «Գևորգ-Հրայր» ՍՊԸ. էջ 55.

Արտաքին հղումներ

• Հայաստանի ֆուտբոլի ֆեդերացիայի պաշտոնական կայքը