Արմենիա հեռուստաընկերություն, հայկական առաջատար հեռուստաալիքներից մեկը։ 2020 թվականի առաջին կիսամյակի դրությամբ ունեցել է ամենաբարձր վարկանիշը Հայաստանում՝ լրատվական, գեղարվեստական ֆիլմերի, սիթքոմների, հեռուստասերիալների, հումորային, երաժշտական հաղորդումների ցանկում[1]։
Պատմություն
Հեռուստաալիքը ստեղծվել է 1998 թվականի հունվարի 13-ին, և պաշտոնապես հիմնադրվել նույն թվականի հուլիսի 23–ին[2]։ Առաջին սեփականատերերն են եղել Ջերարդ Գաֆեսճյանն[3] ու Բագրատ Սարգսյանը։ Առաջին եթերը կայացել է 1999 թվականի հունվարի 13-ին ՝ 24-ժամյա ռեժիմով[4]։
2000 թվականին Հայաստանում առաջինը սկսեց ցուցադրել Չեմպիոնների Լիգան, հետագայում նաև Իտալիայի և Իսպանիայի ֆուտբոլային առաջնությունները: 2001 թվականից հեռարձակվում է արբանյակով և ունի սեփական շրջիկ արբանյակային կայան: 2002 թվականից հեռարձակում է «Ի՞նչ, Որտե՞ղ, Ե՞րբ» ռուսական ինտելեկտուալ խաղը: 2002 թվականից սկսած նկարահանել է ամանորյա բացառիկ ֆիլմեր Դուբայում, Ամստերդամում, Փարիզում, Լոնդոնում: 2004–2005 թվականներին առաջին անգամ կնքել է էքսկլյուզիվ պայմանագրեր հոլիվուդյան կինոստուդիաների հետ և ցուցադրել աշխարհահռչակ ֆիլմեր: Նաև պայմանագրեր է կնքել Գլոբո Թիվիի հետ, ցուցադրելով բրազիլական արտադրության սերիալներ։
Ալիքի ամենավարկանիշային հաղորդումը եղել է Կարգին հաղորդումը, որը եթերում էր 2003 թվականի սեպտեմբերից մինչև 2009 թվականի դեկտեմբերը։ Դրա շնորհիվ հեռուստաալիքը ցուցադրում էր բազմաթիվ հումորային հաղորդումներ․ «Բերնարդ Շոու», «Yere1», «P.S. Club», այդ թվում նաև Կարգին Ստուդիայի սեփական արտադրանքը ՝ «Կարգին Սերիալ», «Ազիզյանները» և կինոնկարները, զբաղեցնելով առաջին հորիզոնականը ժամանցային բնագավառում։
Տեխնիկական սպառազինումից հետո 2012 թվականին տեղի է ունեցել Հայաստանում առաջին փորձնական եթերը՝ HD ձևաչափով, և պաշտոնապես մեկնարկել եթերը այդ ձևաչափով 2013 թվականին[5]։
2016 թվականին Արմենիա հեռուստաընկերությունը նկարահանեց առաջին հայկական 4K հեռուստասերիալը ՝ «Հին արքաներ»։ 2019 թվականի նոյեմբերին հրապարակվեց, որ Արմենիա հեռուստաընկերությունը նախատեսում է առաջինը հայկական հեռուստաշուկայում անցնել 4K ձևաչափի[6], ինչին էլ անցավ 2020 թվականին։
2019 թվականին Արմենիա հեռուստաընկերության 100% սեփականատեր է հանդիսանում Comedy Club Production-ի հիմնադիր և գլխավոր պրոդյուսեր Արթուր Ջանիբեկյանը[7] և իր ընտանիքը ՝ որպես հեռուստաընկերության համասեփականատեր, բիզնեսի զարգացման ղեկավար Ռոբերտ Հովհաննիսյանի գլխավորությամբ։ Սակայն վերջինս 2018 թվականի հունիսի 29–ից հանդիսանում է «Արմենիա Թի–Վի» ՓԲԸ[8], «Պանարմ» ՍՊԸ[9] և «Պանարմ Փաբլիշինգ Հաուս» ՓԲԸ[10]–ների միանձնյա սեփականատերը ՝ անուղղակի մասնակցությամբ։
2020 թվականի դրությամբ եթերի մեջ են մտնում հեռուստաշոուներ, սերիալներ, սիթքոմներ, լրատվական հաղորդումներ, հայկական ու արտասահմանյան ֆիլմեր։
Միջազգային նախագծեր
2012 թվականից Արմենիա հեռուստաընկերությունը Հայաստանում բացառիկ իրավունքով ցուցադրում է Չեմպիոնների Լիգան, ՈւԵՖԱ Ազգերի լիգայի, Եվրո 2020-ի և Աշխարհի առաջնության ընտրական փուլի Հայաստանի հավաքականի խաղերը։ 2019 թվականի հունիսի հրպարակվեց, որ Արմենիա TV-ն գնել է ԵՎՐՈ-2020–ի բոլոր խաղերը ցուցադրելու արտոնագիրը[11]։ 2024 թվականին հեռուստաալիքը հեռարձակեց ԵՎՐՈ-2024–ի բոլոր խաղերը։
Արմենիա TV-ն համագործակցել է Walt Disney, Universal, 20th Century Fox, Warner Brothers, Sony, Talpa, Endemol, Globo TV և այլ հեղինակավոր ընկերությունների հետ։ Հեռուստաալիքը բացառիկ իրավունքով առաջինն է իրագործել հեղինակավոր միջազգային հեռուստաֆորմատների ցուցադրումը. «Հայաստանի ձայնը», «Ամենախելացին», «Հաղթեք րոպեում», «Ի՞նչ, ո՞րտեղ, ե՞րբ», «Դիլ կամ Նո Դիլ», «Ֆորտ Բոյար»։
«Արմենիա Պրեմիում» կաբելային հեռուստաընտանիք
2015 թվականի սեպտեմբերի 14-ից Արմենիա հեռուստաընկերությունը՝ «Յուքոմ» ընկերության հետ համատեղ սկսել է հեռարձակել 6 տարբեր ժանրերի կաբելային ալիքներ[12]։ Ալիքները հասանելի են միայն «Յուքոմ»–ի հեռուստացանցի օգտատերերի համար։ Կաբելային ալիքները տարբերվում են հիմնական «Արմենիա ԹիՎի» հեռուստաալիքից նրանով, որ չեն պարունակում գովազդ, սերիալները հեռարձակվում մեկ օր շուտ, ինչպես նաև ներառում են ֆիլմեր, որոնք ներառված չեն եղել Արմենիա հեռուստաընկերության ցանկում։
«Արմենիա Պրեմիում»–ի հաղորդումները նաև տեղադրվում են «ՊանԱրմենիան» ցանցի պաշտոնական ՅուԹյուբյան ալիքում[13] և ազատ են դիտման համար։ Մինչև այդ «Արմենիա TV»–ի հաղորդումները տեղադրվում էին ռուսական RuTube կայքում, սակայն հետագայում տեղադրված կոնտենտը անհասանելի է դարձել հանրության համար։
| Անվանում
|
Նկարագրություն
|
| Պրեմիում
|
Արմենիա Պրեմիում հեռուստաալիք, որտեղ ցուցադրվում են հիմնական հեռուստաալիքի, ինչպես նաև «Պրեմիում»–ի շրջանակներում ստեղծված ֆիլմեր, սերիալներ ու սիթքոմներ։
|
| Հայ կինո
|
Հայկական ֆիլմերի հեռուստաալիք, որտեղ ցուցադրվում են ֆիլմեր Հայաստանի ազգային կինոկենտրոնի ֆոնդից
|
| Ջան TV
|
Հայկական երաժշտական հեռուստաալիք։
|
| Քոմեդի
|
Հայկական հումորային հեռուստաալիք, որտեղ ցուցադրվում են սերիալներ, մանրապատումներ, կատակերգական ներկայացումներ, շոու ծրագրեր և ժամանցային հաղորդումներ։
|
| Տունտունիկ
|
Հեռուստաալիք երեխաների համար։
|
| Սինեման
|
Հեռուստաալիք, որտեղ ցուցադրվում են միջազգային և վարկանշային ֆիլմեր։
|
Անձնակազմ
Տարբեր տարիներին Արմենիա հեռուստաընկերության աշխատակազմում կամ առանձին նախագծերում ներգրավված դերասանների, լրագրողների ու այլոց մասնակի ցանկը․
Ծանոթագրություններ
Արտաքին հղումներ
