Herbert Nowak (* 23. apryla 1916 w Gołynku; † 6. apryla 2011 w Drjowku) bě delnjoserbski ewangelski farar, spisowaćel, rěčewědnik a kulturny prócowar. W lěće 1997 spóžči so jemu Myto Ćišinskeho „za jogo wurědnu literarnu a pisnu dolnoserbšćinu konsolidujucu tworiwosć.“[1]
Nowak narodźi so wosrjedź Prěnjeje swětoweje wójny jako syn serbskeho wučerja w Gołynku pola Choćebuza. Po šuli studowaše teologiju a słowjansku filologiju.
Jako jedyn z mało delnjoserbskich fararjow dyrbješe wotsaleny wot domizny w němskorěčnych wosadach skutkować. W lěće 1946 pósła jeho Berlinsko-Braniborska cyrkej do Pěśdubow pola Eisenhüttenstadta, hdźež běše 17 lět z fararjom. Wot 1963 do 1978 skutkowaše w Drjowku. W lěće 1978 poda so na wuměnk.
Herbert Nowak pisaše wučbnicu delnjoserbšćiny, wjacore powědančka a předewšěm nastawki za Nowy Casnik, Pratyju, Rozhlad, Lětopis, Nowu dobu, Pomhaj Bóh a dalše.
Najmłódša dźowka fararja Nowaka je delnjoserbska wědomostnica a něhdyša županka Madlena Norbergowa.[2]
Krótko do 95. narodnin zemrě w aprylu 2011 w Drjowku. Nowakowy row ze serbskim pomnikom nadeńdźe so na Choćebuskim Južnym pohrjebnišću.
Twórby
- Mjadwjeź w Lubošcańskiej goli. Wuběrk źěłow. Zestajał Beno Budar, Budyšyn (Kapsne kniglicki 108) 1979
- Marko a Erika. Powědančka, w: Dejm hyšći bomki sajźaś. Antologija dolnoserbskeje literatury, Budyšyn 1985
- Moje pocynki a njepocynki. Dopomnjeńki ze sedym lětźasetkow. Wubrała Ruth Thiemannowa, Budyšyn 1991
- Dolnoserbske prjatkowanja wot lěta 1985 do lěta 1991. Budyšyn 1991
- Eduard jo k nam woglědał. Powědančka, w: Źiw se njewospjetujo. Antologija dolnoserbskeje prozy, Budyšyn 1999
- Prjatkowanja. Zbožne su, kenž Bože słowo słyše a wobchowaju. Podstupim 2007 (Podstupimske pśinoski k sorabistice, čo. 7)
- Pisaŕ běch wót młodych lět, 2016
Žórle
- ↑ Wopodstatnjenje na stronach Załožby za serbski lud
- ↑ Madlena Norbergowa, Pśedsłowo redaktorki, [w:] Prjatkowanja, Podstupim (Podstupimske pśinoski k Sorabistice, Nr. 7), b. 8.
Wotkaz
