A O.M.E.GA (Orquestra de Música Espontánea de Galicia) é unha orquestra de improvisación libre experimental. Está formada por un colectivo duns vinte artistas, na súa maioría galegos, vencellados ó CNTPS (Centro de Novas Tecnoloxías do Pico Sacro), de Santiago de Compostela.
Características
Os seus compoñentes proceden de diferentes campos artísticos. Emiten música totalmente improvisada baixo a dirección xestual de catro dos seus membros, por medio dun sistema de sinais convido previamente no relativo ó ritmo, instrumento, ton, dinámica, tempo, sección, estilo ou silencio.
Entre os elementos sonoros usados, ademais de instrumentos clásicos (violín, violoncello, clarinete, contrabaixo...), a orquestra usa "desde xoguetes a calquera influencia musical ou ruidística, contos para nenos, instrumentos acústicos, música clásica, instrumentos electrónicos analóxicos e dixitais, música contemporánea, free-jazz, textos diversos e referencias a sons do mundo ou música popular de calquera época ou lugar".
