Ignacio José de Allende Unzaga, nado en 1769 e finado en 1811, foi un capitán do exército realista en México que simpatizou co proxecto de independencia do país. Asistiu ás primeiras xuntas secretas da rebelión organizadas polos corrixidores de Querétaro e loitou canda a Miguel Hidalgo na primeira etapa da guerra de independencia. Relevou a Hidalgo no liderado dos insurxentes. En Acatita de Baján, Coahuila, foi traizoado e apresado por Ignacio Elizondo, xunto con Miguel Hidalgo, Mariano Abasolo, Mariano Jiménez e Juan Aldama e conducido á cidade de Chihuahua, onde foi xulgado por insubordinación, fusilado e decapitado. A súa cabeza foi exhibida nunha esquina da Alfóndega de Granaditas, na cidade de Guanajuato, como advertencia ós insurxentes, onde permaneceu 10 anos.
