O iPhone[1] (referido retroactivamente como iPhone 2G,[2] iPhone 1[3] ou iPhone orixinal[2]) é o primeiro modelo de iPhone e o primeiro teléfono intelixente desenvolvido e comercializado por Apple Inc. Despois de anos de rumores e especulacións, anunciouse oficialmente o 9 de xaneiro de 2007,[4] e estreouse nos Estados Unidos o 29 de xuño de 2007.
O desenvolvemento do iPhone como produto comezou en 2005 e continuou en total segredo ata a súa presentación pública. O dispositivo rompeu cos deseños dos teléfonos móbiles imperantes eliminando a maioría dos botóns físicos cunha interface táctil máis amigable. Dispoñía de conectividade móbil GSM de banda cuádrupla con soporte GPRS e EDGE para a transferencia de datos, con acceso continuo a Internet e procesamento integrado para admitir funcións non relacionadas coa comunicación de voz. O seu sucesor, o iPhone 3G, anunciouse o 9 de xuño de 2008.
O iPhone converteuse rapidamente no produto máis exitoso de Apple, e as xeracións posteriores impulsárono a converterse nunha das empresas con máis beneficios do mundo.[5] A introdución da App Store permitiu ás empresas establecidas e aos desenvolvedores de startups construír propostas e gañar beneficios, a través da plataforma, ao tempo que proporcionaba aos consumidores novas formas de acceder á información e conectarse con outras persoas.[6] O iPhone atraeu en gran medida ao público xeral, en oposición á comunidade empresarial na que se centraban nese momento BlackBerry e IBM. Ao integrar a tecnoloxía existente e ampliar a usabilidade, o iPhone transformou a industria dos teléfonos intelixentes.[7]
Notas
