PROFILBARU.COM

Bran
	Historic Monument
Concello	Bran, Romanía
Provincia	Condado de Braşov
Comunidade; autónoma	Transilvania
Coordenadas	45°30′54″N 25°22′02″L / 45.515, 25.3671
Estilo arquitectónico
Estilo orixinal	mestura (elementos góticos) (século XIII)
Estilo actual	mestura, elementos góticos
Estado actual	Restaurado. Visitábel
Véxase tamén
	Castelos de Romanía
	[ editar datos en Wikidata ]

Para outras páxinas con títulos homónimos véxase: Bran.

O castelo de Bran (en romanés: Castelul Bran; en alemán: Törzburg; en húngaro:Törcsvári kastély) é un castelo (fortificación) medieval localizado nun outeiro da aldea de Bran moi preto da vila de Braşov, é monumento nacional e un dos símbolos de Romanía.

A fortificación áchase na raia entre as rexións deTransilvania e Valaquia, na estrada secundaria romanesa DN73. O seu valor estriba na súa antigüidade e arquitectura, porén comunmente se coñece coma o "Castelo de Drácula" e é esa a súa principal atracción turística. O castelo foi unha das múltiples localizacións ligadas a Vlad Țepeș, persoeiro histórico no que se inspirou o personaxe do Conde Drácula da novela homónima do irlandés Bram Stoker do século XIX. Crese que a súa verdadeira fortaleza foi o Castelo de Poenari, hoxe parcialmente en ruínas; tamén morou no Castelo de Hunyad.

Con todo non hai evidencia de que Stoker escoitara falar deste castelo, que pouco ten que ver con Vlad III, O Empalador, voivoda de Valaquia, a suposta inspiración de Drácula. Como descubriu o autor belga Hans Corneel de Roos, a localización que Bram Stoker tiña en mente realmente do castelo de Drácula cando estaba a escribir a novela era o cumio dunha montaña illada, o Monte Izvorul Călimanului, de 2.033 m de alto, situado nos Alpes Kelemen transilvanos preto da fronteira con Moldova.

Hoxe en día o castelo, que pouco ten que ver co estilo gótico escuro e terrorífico dos filmes baseados na novela, é un museo aberto aos turistas, cunha mostra de obras de arte e mobiliario colección da Raíña María de Saxonia. Aos pés do outeiro hai un pequeno museo ao ar libre de construción tradicional romanesa (cabanas, celeiros etc.) de todo o país.

Descrición e historia

A fortaleza está emprazada na raia entre Transilvania e Valaquia e a súa arquitectura é única. No lugar onde achamos o castelo foi construída unha fortaleza polos cabaleiros da Orde Teutónica arredor de 1212, cando foron acollidos no Reino de Hungría, despois de seren derrotados polos sarracenos en Terra Santa e regresaron de Palestina a Europa. Se ben esa pequena fortaleza foi arrasada co paso do tempo e recibiu as arremetidas das hordas tártaras en 1241, a estrutura actual foi ergueita por orde do rei Lois I de Hungría no 1377, para cumprir unha función comercial e defensiva contra o voivoda de Valaquia.

O castelo coñécese hoxe por ser a morada do Conde Drácula, inspirado no príncipe Vlad III O Empalador (nado Vlad Draculea) do século XV. Porén, non hai evidencias de que Vlad (famoso polo xeito cruel de dar morte aos seus inimigos) morase alí, e, segundo a maioría das versións, O Empalador pasou só dous días encerrado nos alxubes do castelo, cando a rexión estaba ocupada polos otománs.

Logo de rematar a primeira guerra mundial, en 1920, asinouse o Tratado de Trianon, onde a rexión de Transilvania será cedida ao Reino de Romanía, polo que o castelo de Bran pasou a pertencer á administración romanesa.

O castelo, que foi posesión da Princesa Ileana (Helena de Romanía), que o herdou de súa nai, a Raíña María, foi incautado polo Goberno comunista de Romanía en 1948. Durante moitos anos foi descoidado, mais trala restauración dos anos 1980 e a Revolución romanesa de 1989, pasou a ser un destino turístico.

O herdeiro legal do castelo era o fillo da Princesa Ileana, o Arquiduque Dominico (Domingos de Habsburgo), e en 2006 o goberno romanés llo devolveu. O Arquiduque Domingos é un enxeñeiro estadounidense que mora en Nova York. En 2007, Domingos de Habsburgo puxo á venda o castelo polo prezo de 50 millóns de euros e a oferta foi aceptada por Roman Abramovich, un multimillonario ruso do petróleo, mais finalmente o trato non se fechou, polo que a propiedade segue en mans dos Habsburgo.

Nunha publicación da revista Forbes dos Estados Unidos, o castelo foi valorado en 140 millóns de dólares, cantidade xustificada polos expertos por mor aos ingresos que podería fornecer este edificio histórico como foco turístico. Porén os propietarios actuais e mailas autoridades insisten en rexeitar o mito de Drácula, e prohiben explotar o castelo coma parque temático sobre este personaxe, o que lle resta moito do seu atractivo. Segundo as últimas novas, a familia Von Habsburg decidiu crear unha sociedade a medias coas autoridades, para manter o castelo aberto aos turistas.

Inspiración para a novela Drácula

Presuntamente, Bram Stoker moldeou partes do carácter do Conde Drácula baseándose en aspectos do persoeiro real de Vlad Draculea, e usou Bran como modelo para describir o castelo deste vampiro.

A imaxe do castelo de Bran empregouse en múltiples adaptacións fílmicas de Drácula, e de xeito informal chegou se ser coñecido coma «Castelo de Drácula».

Turismo

O castelo áchase a uns 30 quilómetros da turística vila de Braşov (a 3 horas en tren de Bucarest). Dende Braşov pódese coller comodamente un bus dende a Estación de Autobuses (Autogara 2) por 14 lei (3,5 €). Chégase a Bran en 20 minutos.

A economía local fixo ligazón coa novela para impulsar o turismo, e nos arredores do castelo hai unha grande feira onde se poden conseguir todo tipo de obxectos relacionados co vampiro (tarxetas postais, imáns, cuncas, camisetas etc.)