Balduíno II de Hainaut, nado en 1056 e finado en Asia Menor en 1098 preto de Nicea, foi conde de Hainaut e Valenciennes (1071-1098) e señor de Beaumont (Hainaut) á morte da súa nai Riquilda de Hainaut. Era fillo de Balduíno VI, conde de Flandres, e de Riquilda, condesa de Hainaut.
Traxectoria
Aínda era un adolescente á morte do seu pai e a súa nai exerceu a rexencia de Flandres e Hainaut en nome do seu irmán máis vello Arnoldo III. Pero as ambicións da nai e o seu goberno tiránico provocaron un ano despois unha rebelión que dexenerou nunha guerra civil. Arnoldo morreu nunha batalla preto de Cassel e Roberto o Frison, o tío de Balduíno e Arnoldo, converteuse no conde de Flandres. Balduíno sucedeu ao seu falecido irmán como Conde de Hainault e pretendente de Flandres. Riquilda recibiu axuda do bispo de Liexa, do que se recoñecera feudataria por Hainaut, pero foi derrotada outra vez en Broqueroie. Balduíno tivo que renunciar a Flandres en 1085, pero foi recoñecido como Conde de Hainaut.
En 1095, cando foi o chamamento do papa Urbano II no Concilio de Clermont, tomou a cruz e marchou á primeira cruzada despois de asistir ao torneo de Anchin xunto a Manass, bispo Cambrai, Radbodo, bispo de Noyon, Lamberto, bispo de Arras, os abades de Hasnon, Crespin e Anchin e outros 300 cabaleiros.
O antagonismo co conde de Flandres fixo que marchase co exército de Godofredo de Bouillon, en lugar do de Roberto II de Flandres (fillo e sucesor de Roberto en Frisia). Tras a captura de Antioqua, foi enviado nunha embaixada a Constantinopla xunto con Hugo I, conde de Vermandois . Foi sorprendido, atacado e asasinado nunha emboscada dos turcománs preto de Nicea.
Devanceiros
Matrimonio e fillos
Casou en 1084 con Ida de Lovaina (m. 1139), filla de Henrique II, conde de Lovaina e Bruxelas e de Adela de Betuwe. Tiveron a:
- Balduíno III (1088 - 1120), conde de Hainaut.
- Luís, vivía no 1096.
- Simón, cóengo en Liexa.
- Henrique (m. despois de 1096).
- Guillerme (m. despois de 1117).
- Arnoldo (m. despois de 1117).
- Ida, casada con Guido, señor de Chièvres e logo, arredor de 1100, con Tomé de Marle (sobre 1073-sobre 1130/1131).
- Riquilda casou en 1115 (separados en 1118) con Amalrico III de Montfort (m. 1136), conde de Evreux.
- Alicia, casada con Nicolao II de Rumigny (m. 1153 ou un pouco máis tarde).
Véxase tamén
Bibliografía
- JJ. de Smet, «Baudouin II», Académie royale de Belgique, Biographie nationale, vol. 1 [détail des éditions], p. 807-808.
- (en inglés) Alan V. Murray, The Crusader Kingdom of Jerusalem: A Dynastic History, 1099-1125, Oxford, Prosopographica et genealogica, 2000.
- Medieval lands.
- Paul André Roger, Arquivos históricos e eclesiásticos de Picardie e de Artois - Tomo 1, p. 265-1842
Ligazóns externas
