Un órgano é un instrumento musical de teclado. Os sons xéranse facendo pasar aire por tubos de diferentes lonxitudes (dende poucos milímetros até varios metros).
Consta de diferentes rexistros ou sons, cuxo timbre dependerá da forma, tamaño, material ou mecanismo de produción do son. Manéxase mediante un ou máis teclados para tocar coas mans, e outro consistente nuns pedais na parte inferior. Os distintos rexistros acciónanse mediante unhas pancas ou botóns ao alcance da man de quen toca o instrumento.
No pasado, o aire fornecíase por medio duns fols movidos a man. Actualmente, tamén se fornece mediante compresores. O órgano tócase con mans e pés, o cal fai recomendábel o estudo doutros instrumentos de teclado para poder pasar ao seu estudo como instrumento.
