Hans Culeman

Hans Culeman
akteur
Hans Culeman as Yndier yn telefyzjespul Brug der zuchten, 1960
Hans Culeman as Yndier yn telefyzjespul Brug der zuchten, 1960
persoanlike bysûnderheden
nasjonaliteit flagge fan Nederlân Nederlânsk
berne 1927
berteplak Rhaunen (Rynlân-Palts)
stoarn 1974
stjerplak De Haach
jierren aktyf 1947-1974
offisjele webside
(in) IMDB-profyl

Hans Dieter Culeman[1] (Rhaunen, 26 septimber 1927 – De Haach, 17 jannewaris 1974) wie in Nederlânsk akteur fan Dútsk komôf. Hy wie ferbûn oan it Nederlands Volkstoneel, Rotterdamse Comedie[2], Toneelgroep Studio, Toneelgroep Theater, Toneelgroep Centrum[3], Nieuw Rotterdams Toneel[4], Haagse Comedie, en spile fierders yn in tal films en telefyzjerigen. Ek hearde er ta de kearngroep fan akteurs dy't oan de Nederlandse Televisie Stichting ferbûn wie.[5] Fierders fertaalde Culeman in toanielstik fan de Eastenrykske toanielskriuwer Hermann Ortner.[6]

Libben en wurk

Repetysje telefyzjespul Lijmen. F.l.n.r. Bernhard Droog, Hans Culeman en Lo van Hensbergen

Culeman waard yn in famylje fan Dútske teologen berne as soan fan in Dútske dûmny en dy syn frou A.C.J.E. Culeman-Schüler. Syn pake wie sindeling op Sumatra. Culeman sr. wegere yn 1934 de eed op nazy-Dútslân ôf te lizzen. De húshâlding flechte yn 1936 nei Nederlân en krige de Nederlânske nasjonaliteit. Culeman sr. studearre genêskunde en fêstige him as dokter yn Amsterdam.

Culeman wurke in skoft by de KLM en folge de privee-oplieding Akademie voor Dramatische Kunst. Nei't er mei Jan Velzeboer Huis clos opfierd hie krige er yn 1947 in kontrakt oanbean by it Nederlands Volkstoneel. Hy spile ûnder oare yn Op hoop van zegen (Barend) en Maria Stuart (Mortimer) fan Friedrich von Schiller. Healwei de jierren fyftich gie Culeman dêrneist foar telefyzje oan't wurk.

Yn 1962 waard er frege foar de rol fan SD-offisier Grundmann yn de film De Overval. Culeman waard yn 1969 lanlik bekend mei syn rol as Maarten van Rossum yn de telefyzjesearje Floris. Yn 1973 wie er te sjen yn in pear ôfleveringen fan de dramasearje Waaldrecht.

Culeman ferstoar yn de âldens fan 46 jier yn syn klaaikeamer oan in hertoanfal, by in opfiering fan De zottin van Chaillot ('La Folle de Chaillot') fan Jean Giraudoux, yn de Haachske Skouboarch.[7] Hy waard beïerdige op Oud Eik en Duinen yn De Haach.

Priveelibben

Culeman wie fiif jier troud mei de juriste Maja Krans (1927 -2016) en soe 21 jier in ferhâlding hân hawwe mei de aktrise Elly van Stekelenburg [8]. Twa jier nei syn dea waard bekend dat er in dochter hie by in net bekend bleaune aktrise.

Boarnen, noaten en referinsjes

Boarnen, noaten en/as referinsjes:
  1. ↑ Hans Culeman, theaterencyclopedie.nl
  2. ↑ Kunst in het kort, Het Vrije Volk 6 juny 1952
  3. ↑ Acteurs naar 'Centrum', De Telegraaf, 26 jan. 1962
  4. ↑ Luc Lutz terug bij het NRT, Het Vrije Volk 4 febr. 1963
  5. ↑ Toneelgroep voor T.V., Friese Koerier, 21 maart 1955
  6. ↑ Toneelgroep Studio thans stichting, De Tijd, 19 oktober 1954
  7. ↑ Hans Culeman (47) overleden, Leeuwarder Courant, 18 jan. 1974.
  8. ↑ Gelachen, De Telegraaf 22 oktober 1973

Strategi Solo vs Squad di Free Fire: Cara Menang Mudah!