Ralph Lauren (New York, 1939kourriaren 14a) estatubatuar moda-diseinatzailea da. Polo Ralph Lauren arropa-markagatik da, batez ere, ezaguna.
Soldadutza egin ostean, gorbatak saltzen hasi, eta erosketa-arduradun izatea lortu zuen erostetxe handi batean. 1967an, lehen diseinu-lanak egin zituen Beau Brumell gorbata-enpresarako, hain arrakasta handiz, non bere konpainia eratzea erabaki baitzuen. Polo izena jarri zion konpainiari, polo kirolaren omenez, aberastasuna eta dotoretasuna irudikatu nahian. 1970ean, gizonezkoentzako arropa-bilduma handi bat sortu zuen, eta New Yorkeko erostetxe handi batean denda berezi bat ireki zuten Laurenen jantziak erakusteko. Hurrengo urtean, emakumezkoentzako jantziak diseinatzen hasi zen, eta bilduma osoa aurkeztu zuen 1972an. Geroztik, era askotako jantziak diseinatu ditu: jeansak, larruzko jantziak, kirol-jantziak, flanelazko alkandorak, jeans higatuak eta etxeko arropak. 1986an, New Yorkeko 5. Hiribideko Rhinelander eraikina erosi zuen, eta, harrezkero, huraxe da Lauren markako dendarik adierazgarriena.
