El Capitán Trueno

Avilan (Espainian) 2006an antolatutako Komikiaren Saloian jarritako murala.

El Capitán Trueno 1956an Víctor Mora Pujadas gidoilariak eta Ambrós marrazkilariak (Miguel Ambrosio Zaragozaren ezizena) sortutako abenturazko komiki sail bat da. Espainiako komikiaren historiako arrakastatsuena da.

Protagonista Capitán Trueno da, Hirugarren Gurutzadaren garaiko (XII. mendearen amaiera), Erdi Aroko espainiar zaldun bat. Goliath eta Crispín lagunekin batera eta, batzuetan, baita neskalagun eta Thule uharteko erregina Sigridekin ere, justiziaren defendatzaile eta zanpatuen askatzaile izaera erakustea ahalbidetuko dioten abenturen bila zeharkatzen du mundua.[1]

Sorrera eta argitalpen ibilbidea

Erdi Aroaren generoa zein XVI eta XVII. mendeetako nabigatzaileena aurretik ere jorratu zituzten espainiar marrazkilariek. Manuel Gago Garcíak (Gago ezinenaz ezaguna) El Guerrero del Antifaz sortu zuen, Taifen erresumen garaian girotua eta Iranzok, El Cachorroren abenturak, Filipe III.a Espainiakoaren floten marinel ausarta. Lan horiek ez bezala, Capitán Truenok balore unibertsalagoak eta "mairua"ren edo amerikar kanibal basatiren aurkako borroka sinplistatik urrunduak defendatzen ditu.

Capitán Trueno 1950eko hamarkadan sortu zen, AEBetan eta Espainian Erdi Aroan girotutako abentura filmak estreinatu zirenean (Prince Valiant, Ivanhoe eta The Talisman kasu): haietako elementuak ondoren Capitán Truenoren istorioetan oso antzeko moduan agertu ziren. Esate baterako, Ivanhoen protagonista torneo batean armajantzi beltz batekin jantzia eta aurpegia ezkutuan duela agertzen da, bilduma ofizialaren lehen alean (A sangre y fuego) gertatzen den bezala: hor, Capitán Trueno modu berean ageri da, Rikardo Lehoi Bihotzek antolatutako torneo batean.

Hasierako garaia (1959-68)

Bere lehen garaian, 1959 eta 1968 artean, Espainiako komikirik ezagun eta hedatuena izan zen, astero, gehienez ere 350.000 ale merkaturatuta. Garai hartan komikiarentzat hedatuen zeuden formatu barietateak erabiliz argitaratu zen, 1956tik ohikoak ziren komiki liburuak kasu, eta bestetik gazteentzako aldizkaria (El Capitán Trueno EXTRA, hori ere asterokoa, bi edo hiru zenbakitik behin abentura oso bat argitaratuz, frantziar-belgiar komikiaren antzera).

Era berean, pertsonaiaren arrakasta handiak lagunduta, haren abenturak Bruguera argitaletxeak argitaratzen zuen Pulgarcitoren erdialdeko orrialdeetan argitaratu ziren. Udako eta Gabonetako oporretan urtero "Almanakeak" ere argitaratzen ziren, abentura oso autoamaitzaileak biltzen zituena, komiki liburuekiko eta gehigarriekiko independenteak zirenak. Inprimaketa (azal guztiak izan ezik, jada kolorean izan zirenak) zuri-beltzean edo bikolorekoa izan zen lehen garai horretan. Koadernotxoetako abenturak Bilduma Erraldoi formatuan lehen aldiz 1960ko hamarkadan bildu ondoren (zuri-beltzean), 1969tik aurrera hasi zen guztia, koadernoetako, Extretako, Pulgarcitoko orrialdeetako eta Almanakeetako lan guztia, koloretan berreditatzen (TRUENO COLOR). Argitalpen horrek zenbait garai izan zituen eta oso arrakasta ezberdina 1970eko hamarkadan.

Erreferentziak

  1. ↑ (Gaztelaniaz) Cómo nació El Capitán Trueno - La reina bruja de Anubis. Ediciones B ISBN ISBN 84-406-2302-X..

Kanpo estekak

Strategi Solo vs Squad di Free Fire: Cara Menang Mudah!