Distrikto Rastatt

Blazono	Mapo
bazaj informoj
federacia lando:	Baden-Virtembergo
distriktaro:	Karlsruhe
regiona ligo:	Meza Supra Rejno
administra sidejo:	Rastatt
areo:	738 km²
Loĝantoj:	234 981 (fine de decembro 2022)
Loĝdenso:	302 po km²
Aŭtokodo:	RA (Rastatt)
Oficiala kodo:	08216

La distrikto Rastatt [raŝtat] situas en la federacia lando Baden-Virtembergo de Germanio. Ĝia administra sidejo estas la samnoma urbo Rastatt. La distrikto estas parto de la distriktaro Karlsruhe kaj de la regiona ligo Meza Supra Rejno. La distrikto kovras parton de la rejna valo kaj de la norda Nigra Arbaro; la rivero Rejno estas ĝia okcidenta limo kaj dividas Germanion oriente kaj Francion okcidente.

La distrikto havas areon de 738 km², kaj fine de decembro 2022 ĝi havis 234 981 loĝantojn. Najbaras la distriktoj Karlsruhe norde, Calw oriente, Freudenstadt sudoriente kaj Ortenau sude, krome en nordokcidento kun mallonga komuna limo la distrikto Germersheim de la federacia lando Rejnlando-Palatinato. En la okcidento, la rivero Rejno konsistigas naturan limon al la najbara ŝtato Francio kun siaj arondismentoj Wissembourg kaj Haguenau ene de la departemento Bas-Rhin. La eksterdistrikta urbo Baden-Baden komplete ĉirkaŭiĝas de la distrikto.

Administra divido

La distrikto konsistas el 23 komunumoj, el kiuj 6 estas urboj. En la sekva listo inter krampoj aldoniĝas la respektiva nombro de loĝantoj laŭ la stato fino de septembro 2006.

Urboj:

1. Bühl (29.499)
2. Gaggenau (29.579)
3. Gernsbach (14.621)
4. Kuppenheim (7.617)
5. Lichtenau (5.144)
6. Rastatt (47.645)

Neurbaj komunumoj:

1. Au am Rhein (3.362)
2. Bietigheim (6.047)
3. Bischweier (3.187)
4. Bühlertal (8.148)
5. Durmersheim (12.132)
6. Elchesheim-Illingen (3.273)
7. Forbach (5.520)
8. Hügelsheim (4.698)
9. Iffezheim (4.931)
10. Loffenau (2.703)
11. Muggensturm (6.234)
12. Ötigheim (4.357)
13. Ottersweier (6.347)
14. Rheinmünster (6.526)
15. Sinzheim (11.166)
16. Steinmauern (2.908)
17. Weisenbach (2.638)

Iuj urboj kaj/aŭ komunumoj interkonsentis kune oferti partojn de la publikaj servoj kadre de administraj komunumaroj. Tiuj grupigoj en la supra listo (laŭ la nuna stato) ne aparte listiĝas.

Partneraj regionoj

Partneraj regionoj en Eŭropo estas

• la urbo Vantaa (Finnlando)
• la provinco de Pesaro kaj Urbino (Italio)

Eksteraj ligiloj

• oficialaj paĝoj de la distrikto (germanlingvaj)

Esperanto en la distrikto

La distrikta Esperanto-grupo inkluzivas plurajn familiojn movade aktivajn - aparte el la urbo Rastatt kaj la iom pli norda komunumo Durmersheim. En seminariejo de la distrikta ĉefurbo okazis pluraj kongresoj de Germana Esperanto-Asocio, Germana Esperanto-Junularo kaj la Baden-Virtemberga Esperanto-Ligo, inkluzive de la Germana Esperanto-Kongreso de la movade "jubilea jaro" 1987, dum kiu la internacia lingvo centjariĝis. La distrikta grupo interalie ankaŭ organizis la tradukon kaj eldonon de la inter germanlingvaj infanoj tre konata libro La malgranda sorĉistino de la aŭtoro Otfried Preussler en Esperanto.

• 
  Rastatt
• 
  Gaggenau
• 
  Bühl
• 
  Durmersheim

Eksteraj ligiloj

• Oficiala retejo