Ĝia longo nord-suda estas 19,6 km, okcident-orienta 17,8 km. Ĝia areo estas 162,85 km², el kiuj 71,9 % estas arbaraj kaj 7,9 % agraj. La unua dokumento pri la urbo estas el 1262 kaj nomas ĝin "Iselen". Urbajn rajtojn ĝi akiris nur en 1940.
En la regiono ĉirkaŭ Bad Ischl oni jam antaŭ jarcentoj minis salon, kies alta valoro certigis prosperon. En 1823 estis instalita la unua kuraca sal-banejo, kaj Bad Ischl iĝis kuracloko tut-eŭrope konata. En la jaroj 1849 – 1914 ĝi eĉ estis la somera rezidejo de imperiestro Francisko Jozefo la 1-a. Lia tiama vilao, nomata Kaiservilla (imperiestra vilao), ankoraŭ ekzistas. Ĝi estis donaco de lia patrino okaze de lia edziĝo en 1854, kaj li nomis ĝin "ĉielo surtera".
