Ĥalkidiko (grekeΧαλκιδική) estas historia pejzaĝo kaj moderna regiona distrikto de Grekio (unu el sume 74 regionaj distriktoj), kiu situas en la sudoriento de la (ene de Grekio norda) moderna administra regiono Meza Makedonio. Ĝis administra reformo de la jaro 2010 la distrikto havis la statuson de provinco, "prefektujo", kiuj greke nomiĝis Νομός, do "nomos".
La teritorio kovras la samnoman duoninsulon en la Egea Maro, kiu iom similas al "mano" kun tri "fingroj". La tri "fingroj", do duoninsuletoj de Ĥalkidiko estas Kasandra, Sitonia kaj Atos. La greke ortodoksaj monaĥejoj de Atos troviĝas en la centro kaj sudo de la plej orienta duoninsuleto, Atos, ekster la teritorio de la provinco, sed estas aŭtonoma ero de la greka ŝtato. La provinco entute kovras areon de 2.918 km² kaj dum la jaro 2001 havis proksimume 105.000 loĝantojn. Ĉefa loĝloko estas la urbo Poligiros.
