«
Un śbal spasiàł.»
(Tagline dal film)
Dark Star (Stéla négra) 'l è 'n film fantàstic dal 1974 ad John Carpenter, chè a 'l sò debùt cuma regìsta in un lungumetràǵ. A s trata dna parudìa dal film 2001: Odissea nello spazio ad Stanley Kubrick.
'L è stâ girâ a Hollywood (Los Angeles) c'n un budget ad ssanta-mila dòlar.
Sunt
Vers la mità dal XXII sécul, al gèn'r umàṅ 'l à mis a punt na tecnulugìa ch'la gh parmét ad far di viàś in dal spasi par culuniśàr dal regiòṅ luntàni in d'l univèrs.
A bōrd dl'astrunâṿ Dark Star 'l equipàǵ fat da 'l tenènt Doolittle (Brian Narelle), da 'l sergìnt Pinback (Dan O'Bannon), da 'l navigadōr Boiler (Cal Kuniholm) e da Talby (Dre Pahich) i gh'aṅ da dastrùś'r i pianéda instàbil ch'i prév'n èsar di ustàcui a i viàś interstelàr.
A vint an da 'l inìsi dla misiòṅ, in du 'l capitàṅ Powell (Joe Saunders) 'l è mòrt p'r un cōrt-sircùit, i quàt'r óm i n in pōlan piò e i strùlgan la manéra par pasàr-'s al tèmp. I gh'aṅ anc na criatùra aglièna ch'la pâr un balòṅ c'n i dènt da dar-ag da magnàr.
In dal méntar ch'i èṅ drē a rivàr a la Nebulóśa Vēl, la nâṿ la patìs na silta 'd energìa eletrumagnética durànt na timpèsta spasiàla ch'la fà di dan a la bómba nùmar vint ch'la s cunvìns ch'l'è óra 'd scupiàr.
Culegamènt estéran