Ysgol Glan Clwyd

Ysgol Glan Clwyd
Hen Adeilad Ysgol Glan Clwyd o'r ffordd fawr(Cyn adnewyddu yn 2017)
Arwyddair	Harddwch, Doethineb, Dysg
Sefydlwyd	1956
Math	Cyfun, y Wladwriaeth
Cyfrwng iaith	Cymraeg
Pennaeth	Sian Alwen
Dirprwy Bennaeth	Eirian Williams
Lleoliad	Ffordd Dinbych, Llanelwy, Sir Ddinbych, Cymru, LL17 0RL
AALl	Cyngor Sir Ddinbych
Disgyblion	1034 (2022)[1]
Rhyw	Cyd-addysgol
Oedrannau	11–18
Gwefan	www.ysgolglanclwyd.co.uk

Ysgol uwchradd cyfrwng Cymraeg yn Llanelwy, Sir Ddinbych ydy Ysgol Glan Clwyd. Agorwyd yr ysgol ym 1956 fel yr ysgol uwchradd Gymraeg gyntaf erioed. Ar y dechrau roedd yr ysgol wedi'i lleoli yn Y Rhyl (ar safle presennol Ysgol Gymraeg Dewi Sant), ond symudwyd i'w safle presennol yn Llanelwy yn 1969.^[2]

Mae gan yr ysgol ddalgylch eang, gyda disgyblion yn teithio o'r ardal arfordirol rhwng Tywyn a Threffynnon hyd at bentrefi Dyffryn Clwyd i'r de ac i'r gorllewin o dref Dinbych. Roedd 725 o ddisgyblion yn yr ysgol ym mlynyddoedd 7–11 yn ystod arolygiad Estyn 2006, yn ogystal â 108 yn y chweched dosbarth, daeth 30% o’r disgyblion o gartrefi lle roedd y Gymraeg yn brif iaith yr aelwyd a 70% o gartrefi lle roedd y Saesneg yn brif neu'n unig iaith. Mae'r un adroddiad hefyd yn dweud fod 95% o’r disgyblion yn siarad Cymraeg fel iaith gyntaf neu i safon gyfatebol.^[1]

Ar yr un safle â'r ysgol mae Canolfan Hamdden Llanelwy a Theatr Elwy, sy'n rhannu eu cyfleusterau â'r ysgol.

Adeilad Newydd

Fel rhan o gynllun Ysgolion yr 21ain Ganrif Llywodraeth Cymru adeiladwyd dau ddarn newydd o'r ysgol, y Dderbynfa a'r Hafan, ar ddarn o gaeau chwarae'r ysgol. Costiodd y prosiect £15.9 miliwn, ac roedd hefyd yn cynnwys adnewyddu'r hen adeilad. Agorwyd y ddau adeilad yn swyddogol ym mis Medi 2017 ond roedd disgyblion eisoes wedi symud i'r adeilad newydd ym mis Ionawr 2017.

Adeilad Newydd Ysgol Glan Clwyd yn 2017

Sioeau Cerdd

Fel sawl ysgol, mae Ysgol Glan Clywd yn llwyfannu sioeau cerdd. Yn y gorffennol mae'r ysgol wedi llwyfannu sioe o'r enw Sioe Y Sioeau, gyda chaneuon o The Lion King a Hairspray. Mae'r ysgol hefyd wedi llwyfannu'r sioe Blood Brothers.

Yn 2023 dyma berfformio Yn y Dechreuad, sioe am hanes Ysgol Glan Clwyd o'i hagor yn 1956 yn yr Rhyl tan heddiw. Mae'r sioe yn cynnwys caneuon gan Caryl Parry Jones.

Côr Ysgol Glan Clwyd

Mae'r ysgol yn nodedig am ei chorau.

Prif: Rhestr o ganeuon a recordiwyd gan Gôr Ysgol Glan Clwyd

Cyn-ddisgyblion o nod

• Tara Bethan - Actores
• Becky Brewerton - Golffwraig Broffesiynol
• Dewi Gwyn – Aelod o'r Anhrefn.
• Gareth Jones - Cyflwynwr teledu
• Caryl Parry Jones - Cantores
• Manon Rhys - Llenor
• Bryn Williams - (g. 6 Mehefin 1977); cogydd a pherchennog 'Bwyty Odette', Bryn y Briallu, Llundain.^[3] a chyflwynydd teledu.
• Mark Evans - Cantor
• Beth Jones - Comediwraig
• Wyn Bowen Harris - actor a dramodydd (ei dad oedd cyd-sefydlydd yr ysgol - Leslie Harris)

Cyfeiriadau

1.  Adroddiad Arolygiad Ysgol Glan Clwyd 23/10/06. Estyn (27 Rhagfyr 2006).
2.  'Addysg Gymraeg: Dathlu 50 mlynedd' ar BBC Cymru'r Byd.
3. "copi archif". Archifwyd o'r gwreiddiol ar 2008-10-04. Cyrchwyd 2014-06-06.

Dolenni allanol

• Gwefan yr ysgol^{[dolen farw]}