Sturmgewehr 44

Sturmgewehr 44
Ur fuzuilh-vindrailher Sturmgewehr 44 eus dastumadegoù an Armémuseum (Stockholm)
Kinnig
Bro	Trede Reich
Doare	Fuzuilh-arsailh aotomatek / damaotomatek
Mont en-dro	Tennata dre amprest-gazoù, piston
Munisionoù	7,92 × 33 mm Kurz
Produer	C. G. Haenel Waffen und Fahrradfabrik
Mare implij	1944-1945
Pouez ha muzulioù
Mas (hep kartouchenn)	4,6 kg
Mas (karget)	5,13 kg
Hirder	940 mm
Hirder ar c'hanol	420 mm
Perzhioù all
Hed-tenn pleustrek	300 m (mod aotomatek), 600 m (mod damaotomatek)
Lusk-tennañ	Etre 500 ha 600 tenn/mn
Tizh mont e-maez ar boledoù	685 m/s
Endalc'h	Karger-fiñv 30 kartouchenn
Lezenn
Rummad e Bro-C'hall	A

Ar Sturmgewehr 44 pe StG 44, da lavaret eo "Fuzuilh-arsailh 44", a zo ur fuzuilh-arsailh bet sevenet ha produet gant an Trede Reich e-kerzh an Eil brezel-bed, adalek ar bloavezh 1944. Gwelet e vez evel ar fuzuilh-arsailh vodern kentañ^[1]. Kambret eo e 7,92 × 33 mm Kurz. Anvet e vez a-wechoù gant e anv kentañ, MP 43 (diwar Maschinenpistole, pistolenn-vindrailher, hag ar bloavezh 1943), pe MP 44, abalamour ma oa bet lakaet e servij er bloavezh 1944^[2].

Istor

Goude aloubadeg an URSS e 1941 en em gavas ar Wehrmacht paket e emgannoù-kêr evel hini Stalingrad. Kompren a reas an Alamaned e oa ret dezho sevel armoù-skoaz efedusoc'h evit o c'harabinennoù Mauser 98k en endro-mañ. Ijinet e voe neuze ar munision 7,92 × 33 mm Kurz, a oa skañvoc'h evit reoù 7,92 × 57 mm ar Mauser met galloudusoc'h evit an 9 mm Parabellum implijet er pistolennoù-mindrailher MP 40.

Ijinet e voe an StG 44 gant Hugo Schmeisser en embregerezh C. G. Haenel Waffen und Fahrradfabrik e 1943, dindan an anv MP 43 da gentañ^[2]. Er bloaz war-lerc'h e voe roet lañs d'ar produiñ goude asant ar galloud nazi ha roet ar skouerennoù kentañ d'ar soudarded en hañv 1944^[1]. Servijout a reas un tamm an StG 44 e emgannoù Normandi hag Italia, ha kalz muioc'h e emgann an Ardenne e miz Kerzu 1944 ha miz Genver 1945, e-lec'h ma tiskouezas perzhioù mat met ivez perzhioù fall : pouez uhel (5,2 kg karget), lamm vresk, kanol o tommañ buan hag arm-skoaz diaes da implijout en e c'hourvez abalamour d'e garger hir.

Tro 450.000 pe 500.000 skouerenn eus an StG 44 a voe produet betek deroù 1945^[2]. War-dro 200.000 anezho ne voent biken implijet gant an Trede Reich.

Goude ar brezel

Komiserdi poblel armañ an URSS, nec'het o welet an Trede Reich o kaout kement a lañs war dachenn an armoù modern gant an StG44, a roas lañs d'ar 15 a viz Gouere 1943 d'ur genstrivadeg a-benn sevel ur arm soviedel a c'hellfe talañ ouzh an StG 44. Diwar-se e voe krouet an AK-47 krouet gant an ijinour Mic'hail Kalachnikov.

Skouerennoù eus an StG 44 a voe implijet gant an Arme ruz ur wech dinazifiet, da lavaret eo tennet an holl arouezioù nazi diwarne.

• 
  Un StG44 etre daouarn ur jaked
• 
  Ur soudard saoz gantañ ar Zielgerät 1229, ar c'hentañ lunedenn evit gwelet en noz
• 
  Un troadeg eus an Trede Reich gant ur Sturmgewehr 44 hag ul lunedenn

Tro-dro d'ar Sturmgewehr 44

An StG 44 a c'haller implijout e meur a c'hoari video, evel Battlefield 1942, Brothers in Arms, Brothers in Arms: Road to Hill 30, er rummad Call of Duty hag e c'hoarioù an heuliad Wolfenstein.

Liammoù diavaez

• (en) Filmig o tiskouez tennañ gant un STG-44
• (en) Filmig ar Military channel diwar-benn an arm
• (fr) Diellfilm war an arm e lodenn Tir et Histoire ar chadenn Le Feu aux Poudres, 06/06/2022

Daveennoù

1. '(fr)' ROB Houston, STROYAN Christine (renerezh), Armes à feu de légende, Larousse, 2019, p. 214-215
2. (en) POPENKER Maxim, Stg.44 Sturmgewehr / MP-43 / MP-44 Schmeisser, Modern Firearms (lennet d'ar 17/10/2024)

  Stag eo ar bajenn-mañ ouzh Porched an Armoù-tan