Susurungan atawa sasarungan marupakan salah sabuting tradisi lisan nang ada di masarakat Banjar Hulu. Susurungan baasal matan kata surungan nang maalami paulangan kata. Susurungan diartiakan sawagai teka-teki (batatangguhan).[1]
Fungsi susurungan
Ada babarapa fungsi susurungan antara lain sawagai barikut;
Mauji ilmu
Susurungan rancak dijadiakan sawagai sarana gasan mangatahui sajauh mana lawan bapandir kawa manjawab atawa bapikir lamun ada urang nang mamulai susurungan. Haratan manjawab susurungan, lawan bapandir pacang bapikir nang logis.[1]
Maisi waktu haratan bagadang manjagai mayat
Susurungan jua bafungsi sawagai maisi waktu haratan bagadang manjagai mayat lawan tujuan mangurangi rasa sadih kulawarga nang ditinggalakan wan jua sakira urang-urang nang manjagai mayat kada mangantuk wan kawa manggawi gawiannya mahadang mayat sampai baisukan.[1]
Sakira kawa malabihi urang lain
Susurungan jua bafungsi malabihi urang lain lawan cara mangecoh lawan bapandir sahingga urang nang mandangar partakunan susurungan pacangan bingung mancari jawaban partakunan nang diajuakan.[1]
Jujuhutan
- ^ a b c d Hestiyana, N. F. N. (2015). Fungsi Tradisi Lisan Susurungan Bagi Masyarakat Banjar Hulu. Mabasan, 9(2), 87-98.
