Kacubung

Buah Kacubung

Kacubung atawa tanaman nang baisian ngaran lmiah Datura metel L, tanaman ini tamasuk dalam family Solanaceae.^[1] Kacubung ada jua nang manyambat tanaman tarumpit sitan atawa tanaman tarumpit bidadari.^[2]

Morfologi

Kambang Kacubung

Buah Kacubung babantuk parak bulat, batangkai buah handap nang marikit kuat, intangan luar buahnya ditumbuhi duri-duri nang ukurannya bamacam-macam, di dalam buahnya baisi bigi nang halus-halus babalang kuning bacampur habuk.^[1] Kacubung tamasuk tanaman baduri nang tingginya sakitar 0,40-1 m. Daun Kacubung baukuran sakitar 15 cm, kambangnya ada nang babalang bigi raman ada jua nang babalang putih.^[3] Kambang Kacubung babantuk kaya tarumpit, cagat, kaluar matan hujung tangkai, mararak wayah matahari tinggalam tagal kuyup wayah kamarian isuknya.^[2]

Habitat

Kacubung baasal matan Amerika, di Indunisia tumbuh tasabar luas tarutama di dairah nang iklimnya karing, tumbuh liar di alam tabuka, tanah nang bapasir, kada talalu jijip nang kaya di samak-samak atawa padang kumpai tabuka, dataran randah sakitar 800 mdpl, lawan di higa sungai.^[2]

Manpaat

Hasil pangujian kandungan kimia dalam tanaman manampaiakan bahwa buah Kacubung mangandung alkaloid, flavonoid, polivenol lawan saponin.^[1] Bagian tanaman Kacubung nang mangandung senyawa kimia ditamuakan parak di samunyaan rapunnya nang kaya akar, tangkai, daun, buah, bunga, lawan bigi. Kacubung gasan kasihatan banyak dimanpaatakan gasan ubat asma, sakit gigi, ubat bius, lawan ubat pahilang rasa sakit.^[4]

Kacubung kawa jua dimanpaatakan gasan bahan maulah insektisida alami. Marga ini Kacubung kawa dimanpaatakan gasan maubati tanaman kabun nang disarang hama panyakit.^[5]

Buah Kacubung kabanyakan danggap masyarakat buah nang babahaya, marga kawa maulah karacunan. Padahal, buah Kacubung manyimpan manpaat sabagai antibakteri nang kawa mangurangi partumbuhan bakteri Staphylococcus aureus nang maulah kakanakan sakit talinga.^[1] Anggapan Kacubung kawa manyababakan karacunan sabujurnya kada karamput, masalah nang cungul amun karacunan Kacubung nang kaya maigau, mangantuk, awak kajang, muntung karing, kulit karing, kalainan kundisi jantung, bahalusinasi atawa tabayang hal nang kada bujur, pupil mata baganal, awak panas bakajutan, sampai kalumpuhan.^[3]

Kandungan lain matan Kacubung yaitu atropine, hiosiamin, skopolamin, alkaloid lawan atropine. Kandungan alkaloid lawan atropine ini kawa manimbulakan pangaruh bius lawan sarap pusat manusia bila masuk ka dalam darah malalui jalan pahinakan. Skopolamin rancak digunaakan gasan ubat mauk laut, kawa jua gasan ubat panahan sakit lawan ubat guring.^[6]

Catatan Batis

1. ^ Elvira, Maylisa (2017). UJI AKTIVITAS ANTIBAKTERI EKSTRAK BUAH KECUBUNG (Datura metel L) TERHADAP BAKTERI Staphy (Tesis) (dalam bahasa Inggris). Akademi Farmasi Putera Indonesia Malang. 
2. ^ KURNIA, ANNIDA WAHYU (2016-08-16). PENGARUH INSEKTISIDA NABATI FILTRAT DAUN KECUBUNG (Daturametel L) TERHADAP JUMLAH KEMATIAN HAMA PADI WERENG COKLAT (NilaparvatalugensStal) DAN IMPLEMENTASINYA SEBAGAI BAHAN AJAR MATERI BIOTEKNOLOGI DI SMA (Tesis) (dalam bahasa Inggris). Universitas Muhammadiyah Surabaya. 
3. ^ Rozalina, Irma; Sudisma, I. Gusti Ngurah; Dharmayudha, Anak Agung Gde Oka (2017). "Identifikasi Senyawa Kimia Ekstrak Etanol Bunga Kecubung (Datura metel l.) di Bali yang Berpotensi sebagai Anestetik" (dalam bahasa English). Pemeliharaan CS1: Bahasa yang tidak diketahui (link)
4. Gente, Meyske; Leman, Michael A.; Anindita, P. S. (2015). "UJI EFEK ANALGESIA EKSTRAK DAUN KECUBUNG (Datura metel L.) PADA TIKUS WISTAR (Rattus norvegicus) JANTAN". e-GiGi (dalam bahasa Inggris). 3 (2). doi:10.35790/eg.3.2.2015.9838. ISSN 2338-199X. 
5. Idris, Herwita; Balai Penelitian Tanaman Rempah dan Obat Jalan Tentara Pelajar No. 3 Bogor, 16111 (2020-11-06). "TANAMAN KECUBUNG (Datura metel L.) SEBAGAI BAHAN BAKU INSEKTISIDA BOTANIS UNTUK MENGENDALIKAN HAMA Aspidomorpha milliaris F". Diarsipkan dari versi asli tanggal 2023-03-26. Diakses tanggal 2023-03-26.  line feed character di |last2= pada posisi 41 (bantuan)
6. Hasanah, Arum; Khoerunnisa, Asyri; Aisyah, Dinda; Aeni, Farida Nur; Yuniarsih, Nia (2022-12-20). "Review Artikel : Kajian Tanaman Herbal Yang Digunakan Untuk Penyakit Saraf Melalui Sistem Penghantaran Obat Sistem Saraf Pusat". Jurnal Pendidikan dan Konseling (JPDK) (dalam bahasa Inggris). 4 (6): 12441–12447. doi:10.31004/jpdk.v4i6.10497. ISSN 2685-936X.