PROFILBARU.COM

Валерый Уладзіміравіч Шаблюк
Валерый Уладзіміравіч Шаблюк
Дата нараджэння	3 жніўня 1953
Месца нараджэння	Узда, Уздзенскі раён, Мінская вобласць, БССР, СССР;
Дата смерці	2 мая 1997 (43 гады)
Месца смерці	Мінск, Беларусь;
Грамадзянства	СССР; Беларусь;
Род дзейнасці	навуковец
Навуковая сфера	гісторык і археолаг
Месца працы	Інстытут гісторыі НАНБ;
Навуковая ступень	кандыдат гістарычных навук (1991)
Альма-матар	гістарычны факультэт БДУ (1975);
Партыя	Беларуская хрысціянска-дэмакратычная партыя;

Валерый Уладзіміравіч Шаблюк (3 жніўня 1953, Узда, Мінская вобласць — 2 мая 1997) — беларускі археолаг, гісторык. Спецыяліст па гісторыі сельскіх паселішчаў Цэнтральнай Беларусі ў XIV—XVIII стагоддзяў. Кандыдат гістарычных навук (1991)^[1].

Біяграфія

Скончыў у 1975 годзе гістарычны факультэт БДУ. Працаваў настаўнікам гісторыі ў Мінску. У 1980—1997 гадах навуковы супрацоўнік аддзела сярэдневяковай археалогіі Інстытута гісторыі АН Беларусі. Кірункі навуковай дзейнасці: археалогія сярэднявечных сельскіх паселішчаў і мястэчак (у той час новы кірунак у беларускай археалогіі). У 1991 годзе абараніў кандыдацкую дысертацыю па тэме: «Сельскія паселішчы Верхняга Панямоння XIV—XVIII ст.ст.», у 1996 годзе апублікаваную як манаграфія. У 1995 годзе выйшла кніга В. Шаблюка «Двор у Туганавічах».

Старшыня першаснай прафсаюзнай арганізацыі педагогаў Інстытута гісторыі АН Беларусі Беларускага свабоднага прафсаюза.

З 1994 года — генеральны сакратар Беларускай хрысціянска-дэмакратычнай партыі. У 1995 годзе — кандыдат у дэпутаты Вярхоўнага Савета Рэспублікі Беларусь па Усходняй выбарчай акрузе № 246 г. Мінска. Загінуў у дарожна-транспартным здарэнні.

Навуковая дзейнасць

Напрамкі даследаванняў: сацыяльна-эканамічнае развіццё сярэднявечных беларускіх сельскіх паселішчаў, мястэчак, маёнткаў у басейне ракі Нёман; гаспадарчая дзейнасць і матэрыяльная культура сельскага насельніцтва^[1].

Аўтар публікацый па гісторыі і археалогіі Беларусі, каля 100 артыкулаў у Энцыклапедыі гісторыі Беларусі.

Навуковыя працы

Гістарычная тапаграфія і планіроўка мястэчак верхняга Панямоння // Гіст.-археалагічны зб. — Мн.,1994. № 3;
Забудова прынёманскіх мястэчак у 16-18 стст. // Гіст.-археалагічны зб. — Мн., 1995. № 6;
Да пытання фарміравання мястэчак Беларускага Панямоння // Гіст.-археалагічны зб. — Мн., 1996. № 10
Сельскія паселішчы Верхняга Панямоння: XIV—XVIII ст. Мінск, 1996.