Da Hening Fraunz (* 24da Oktoba 1867 in Riad im Ingroas, † 27da Oktoba 1937 in Linz) woa a owaestareichischa Dialektdichda und drai Joazant laung Biagamoasda fu Kremsmünsda.
Sai Lem
Da Hening Fraunz is im ifia'l in Riad auf d'Wöd kema. Sai Fota woar a Awadeka und sei Muada a Guvanantn, owa seine zwoa Ötan han schau fria gschdoam und mid fia Joa woar a gauns aloa. Auf des aufi hod eam sei Onki, da Racha Koal, aufgnuma, dea a Kubfaschmiad in Kremsmünsda woa. Bai dem hod a a s'Kubfaschmiashaundweak gleand und is bai eam blim, bis das dea a gschdoarim is. Dano is a ois junga Gsö noch Windischgasdn gaunga, zruk noch Riad und a noch Linz. Noch seina Gsönroas is a zruk noch Kremsmünsda gaunga und hod mid da Witwe fu seim Onki s'Gscheft waida gfiad.
Im 1900a Joa hod a doat a ghairat, d'Maria Herschetzky, a Dochda fu am Finanza, und hod in Onki sei Kubfaschmidn söwa iwanuma. Daun han e schau d'Kinda kema, a Bua dens August ghoassn haum und a Diandl, s'Margredl. Im 1909a Joa is a daun sogoa Biagamoasda woan fu Kremsmünsda, an Bosdn den a de negsdn 30 Joa ghobt hod, duach ole bolitischn Faendarungen duachi. Sai Wai is owa nu oisa junge gschdoarim und aso hod a a zwoats Moi ghairat, a Wiatsdochda, s'Dowihofa Annal, mid dear a nu a kloans Dechdal griagt hod, des a auf Anna dauft haum.
De gaunzn negsdn Joazant woa da Hening Fraunz sowoi Kubfaschmid ois wia a Biagamoasda. In seina Zeid is in Kremsmünsda de easchde elektrische Schdossnbelaichtung gmocht woan, ea hod a neiche Hauptschui baun lossn und d'Gmoa hod auf sei Iniziativn hii s'"Dilettantentheater" kaft, des woss heit nu gibt. Danem hod a oiwai a weng dicht und Mundoatgschichtn gschrim und hod in de 1930ga Joa sogoa a aigane Radiosendung baim Radio Linz ghobt. Gschdoam is a oisa 70jarige am 27da Oktoba 1937 im Schbidoi fu de boamheazing Briada. Sai Dochda, d'Magredl hod schbeda noch Schanghai ghairat und is ausgwaundat und sei Su, da August, hod s'Kubfaschmidgscheft iwanuma.
Sai Weak
Da Hening Fraunz hod nu foa seina Zeid ois Biagamoasda drai Biacha auf Dialekt gschrim.
Literatua
- Renate Mistlberger: Der oberösterreichische Mundartdichter Franz Hönig- Leben, Werk und Sprache, 1986, 119 Bl.
Im Netz
