Tamara Todevska

Tamara Todevska
mak. Тамара Тодевска
Tamara Avroviziya 2008 səhnəsində
Ümumi məlumatlar
Doğum adı	Tamara Todevska mak. Тамара Тодевска
Doğum tarixi	1 iyun 1985 (39 yaş)
Doğum yeri	Skopye, Şimali Makedoniya, Yuqoslaviya Sosialist Federativ Respublikası
Vətəndaşlığı	Şimali Makedoniya
Musiqiçi məlumatları
Fəaliyyəti	müğənni
Fəaliyyət illəri	2003–h.h.
Janr	Pop
Əlaqəsi	Tiyana Dapçeviç
Vikianbarda əlaqəli mediafayllar

Tamara Todevska (mak. Тамара Тодевска; d. 1 iyun 1985, Skopye, Şimali Makedoniya, Yuqoslaviya Sosialist Federativ Respublikası) — Şimali Makedoniya müğənnisi.

Həyatı

Tamara Todevska 1 iyun 1985-ci ildə Yuqoslaviya Sosialist Federativ Respublikasının tərkibində olan Şimali Makedoniyanın Skopye şəhərində dünyaya göz açmışdır. Tamaranın atası Velko Todevski musiqi müəllimi, Bosniya və Herseqovinada anadan olan Serb əsilli anası Branka Todevska isə opera ifaçısıdır. Onun böyük bacısı Tiyana Dapçeviç "To The Sky" mahnısı ilə Şimali Makedoniyanı 2014 Avroviziya Mahnı Müsabiqəsində təmsil etmişdir.

Musiqi karyerası

Tamaranın ilk mahnısı 1997-ci ildə bacısı Tiyana ilə birlikdə ifa etdiyi "Igra luda" (azərb. Çılğın oyun‎) olmuşdur. O, 2003-cü ildə Monteneqroda keçirilən Sunçane Skale musiqi festivalında "1003" adlı mahnı ilə çıxışından sonra şöhrət qazanmışdır. Tamara festivalda 2-ci yerdə qərarlaşmışdır.

"Sino"

2005-ci ildə Tamaranın "Sino" (azərb. Göy‎) adlı debüt albomu işıq üzü görmüşdür. Tamara albomun prodüseri Aleksandar Masevski ilə 2004-cü ildən bəri əməkdaşlıq etmişdir. "Sino", "Molci, molci", "A, što ako?", "Ljubovna prikazna", "Najverni prijateli", "Ljubi, ljubi", Šetaj" kimi hitlərin yer aldığı albom 2005-ci ildə "İlin albomu" seçilmişdir.

Nacionalen Eurosong 2007

2007-ci ildə Tamara "Kazi Koj Si Ti" mahnısı ilə Şimali Makedoniyanın Avroviziya milli seçim turunda iştirak etmişdir. O, nəticədə 105 xal toplayaraq ikinci yerdə qərarlaşmış və Şimali Makedoniyanı müsabiqədə təmsil etmək fürsətini əldən vermişdir.

Skopje Fest 2008

2008-ci ilin fevral ayında Tamara Vrçak və Adriyan ilə birlikdə ifa etdiyi "Vo ime na ljubovta" mahnısı ilə Skopje Fest 2008-də qələbə qazanmışdır.^[1] Balkanlarda hit olan mahnının ingilis, serb, türk, rus və alban dillərində versiyaları da təqdim olunmuşdur. Tamara, Vrçak və Adriyan triousu həmin mahnının ingilis dilindəki versiyası ilə Şimali Makedoniyanı Serbiyanın paytaxtı Belqradda keçirilən 2008 Avroviziya Mahnı Müsabiqəsində təmsil etmişdir. Müsabiqənin yarımfinalında 10-cu yerdə qərarlaşmalarına baxmayaraq, münsiflərin qərarı ilə Makedoniya finala keçə bilməmişdir.

2019 Avroviziya Mahnı Müsabiqəsi

Tamara Todevska "Proud" mahnısı ilə Şimali Makedoniyanı İsrailin Tel-Əviv şəhərində keçirilən 2019 Avroviziya Mahnı Müsabiqəsində təmsil etmişdir.^[2] Tamara müsabiqə üçün aparılan uzun məşqlərin ardınca 16 may tarixində baş tutan yarımfinal mərhələsində 17-ci nömrə altında çıxış etmişdir. Nəticədə 239 xalla 2-ci yeri tutaraq, final mərhələsinə vəsiqə qazanmışdır. Müsabiqənin finalında bir daha öz mahnısını ifa edən Tamara 26 ölkə təmsilçisinin mübarizə apardığı şouda 305 xal toplayaraq, 7-ci yerdə qərarlaşmışdır. O, finalda münsif səsverməsinə görə birinci yeri tutsa da, SMS səsverməsində on ikinci yerdə qərarlaşmışdır. Bu Şimali Makedoniyanın Avroviziya tarixindəki ən yüksək nəticəsi olmuşdur.

Şəxsi həyatı

27 iyun 2015-ci il tarixində Tamara keçmiş basketbol oyunçusu Aleksandar Dimitrovski ilə ailə həyatı qurmuşdur.^[3] Cütlüyün Hana adlı bir qızı və Daren adlı bir oğlu var.^[4]

Diskoqrafiya

Albomlar

• Sino (2005)
• Eden den (2015)

Sinqllar

• 1997 "Igra luda" (Tiyana Dapçeviç ilə duet)
• 2002 "Dali znam"
• 2002 "Koga bi mozela" (Branka Todevska ilə duet)
• 2003 "1003"
• 2004 "Sex"
• 2004 "Sino"
• 2004 "Molci molci" (Ronin ilə duet)
• 2005 "Najverni Prijateli"
• 2005 "Ljubi, ljubi" (Tuna ilə duet)
• 2005 "Šetaj"
• 2005 "A, što ako?"
• 2005 "Ljubovna prikazna" (Ugro ilə duet)
• 2006 "Losa Devojka"
• 2006 "Sedmo Nebo" (Vrçak ilə duet)
• 2007 "Kaži Koj Si Ti"
• 2007 "Luda" (DNK və Vrçak ilə birlikdə)
• 2007 "Za Makedonija" (Toni Zen ilə duet)
• 2007 "Smešhno zar ne"
• 2008 "Let me love you" (Vrçak və Adriyan ilə birlikdə)
• 2008 "So maki sum se rodila"
• 2008 "Dajem Ti Sve"
• 2009 "Usne ko krv"
• 2009 "Una magia Pandev" (Toni Zen ilə duet)
• 2009 "Šarena Pesma"
• 2009 "Davam Jas Se"
• 2010 "Šila"
• 2011 "Gušni me"
• 2011 "Ne me zamaraj"
• 2011 "Nejkješ da sum sama"
• 2012 "Možeš li"
• 2012 "Zaludno e"
• 2012 "Samo sakam da"
• 2014 "Teško bez tebe"
• 2014 "Brod što tone"
• 2015 "Frazi ljubovni"
• 2015 "Baš na tebe"
• 2018 "Doviduvanje tago"
• 2019 "Proud"

İstinadlar

1. "FYR Macedonia: Tamara, Vrcak & Adrian win - Eurovision Song Contest Tel Aviv 2019". www.eurovision.tv. 2013-10-13 tarixində arxivləşdirilib. İstifadə tarixi: 2019-01-25.
2. "FYR Macedonia: Tamara Todevska to Sing "Proud" at Eurovision". Eurovoix. 8 fevral 2019. 2019-03-27 tarixində arxivləşdirilib. İstifadə tarixi: 2019-02-12.
3. "Arxivlənmiş surət". 2016-04-04 tarixində arxivləşdirilib. İstifadə tarixi: 2019-01-25.
4. "Тамара Тодевска стана мајка". 2019-06-06 tarixində arxivləşdirilib. İstifadə tarixi: 2019-01-25.

Əvvəlki: Eye Cue "Lost and Found"

Şimali Makedoniya Avroviziya Mahnı Müsabiqəsində 2019

Sonrakı: –

Xarici keçidlər