Salvador Seguí

Salvador Seguí
Vida
Nacimientu	Lleida, 22 de setiembre de 1887
Nacionalidá	España
Muerte	Barcelona, 10 de marzu de 1923 (35 años)
Causa de la muerte	ejecución extrajudicial ^(es)
Familia
Pareyes	Teresa Muntaner Cabarrocas ^(en)
Estudios
Llingües falaes	castellanu catalán
Oficiu	anarcosindicalista, políticu, pintor
Miembru de	Confederación Nacional del Trabayu
Seudónimos	El Noi del Sucre

Lápida de Salvador Seguí nel cementerio de Montjuïc

Salvador Seguí Rubinat (22 de setiembre de 1887, Lleida – 10 de marzu de 1923, Barcelona), conocíu como El noi del sucre ('El rapaz del azúcar'), foi una de les persones más destacaes del anarcosindicalismu de Cataluña nos entamos del sieglu XX. Buscó dar un nuevu puxu a la llucha proletaria ensin escaecer les esencies del so ideariu anarquista.

Formóse como pintor, profesión que siempre exerció y cola que se ganó la vida. Yá dende bien mozu mostró inquietú pola política y por les idees llibertaries; seguidor de la Escuela Moderna de Francisco Ferrer Guardia y de varios autores como Sorel, Kropotkin, Reclus o Cornelissen, na so formación autodidacta tamién se relacionó con personaxes culturales y políticos de la dómina, y con miembros y participantes del Ateneu Enciclopèdic Popular, como Francesc Layret.^[1]

Afaló la formación y educación de les clases obreres dende los sindicatos como armes revolucionaries: la preparación intelectual, cultural y téunica de los trabayadores.

Foi presidente del Atenéu Sindicalista de Barcelona,^[2] onde fundó y organizó la so biblioteca en 1915, llugar nel que s'asumieron funciones de centru superior d'estudios sindicalistes y anarquistes.

Impulsor de la creación de Solidaridad Obrera, formando parte del conseyu directivu (como vocal) a lo llargo d'un tiempo. En 1916 entama les negociaciones pa una pactu d'unidá d'aición ente la CNT y la UXT como frente únicu del movimientu obreru español que comportó inicialmente una güelga xeneral de 24 hores como protesta pol aumentu de preciu de subsistencies y que continuó con una güelga xeneral indefinida, en 1917, en petición al Gobiernu español d'un sistema que garantizara a la población el desarrollu d'actividaes emancipadores y mínimes condiciones de calidá de vida.

Elixíu secretariu xgeneral de la CNT de Cataluña nel Congresu Rexonal entamáu en Sants, en 1918, propunxo que fuera permitida la intervención de los maestros racionalistes n'aspectos de sindicatos "siempre que s'entamaran corporativamente"; respaldáu pola totalidá de delegaos al so favor foi adoptao como resolución.^[3]En congresos posteriores, xunto a Ángel Pestaña y Juan Peiró opúsose a aiciones más exaltaes llevaes a cabu por otros miembros de la CNT.^[4] Cabe mencionar l'entamáu nel Teatru de la Comedia (Madrid) o el Plenu de rexonales de Zaragoza nos que presentaron la proposición de retirada de la CNT de la Tercera Internacional.

Foi deteníu en diverses ocasiones por mor de la so actividá anarcosindicalista. A lo llargo de la güelga de La Canadiense alcontrábase presu pero foi lliberáu'l mesmu día en que se desconvocó y pudo poner n'evidencia les sos grandes dotes d'orador na asamblea entamada pol comité de güelga, na Plaza de toros de las Arenas de Barcelona pa informar sobre los acuerdos llegaos col gobiernu. En payares de 1920 y xunto con Lluís Companys, el sindicalista Martí Barrera y hasta trenta y seis persones más, foi deportáu al castiellu de la Mola (Mahón).

El 10 de marzu de 1923, en plena xera por promover ente los trabayadores la idea de la emancipación como motor d'una sociedá existente, foi asesináu d'un tiru na esquina de la calle Cadena con Sant Rafael, nel barriu del Raval de Barcelona, por pistoleros blancos del Sindicato Libre^[5] de la patronal catalana, protexida pol Gobernador Civil de Barcelona Martínez Anido,^[6] agrupada en torno a la Lliga Regionalista. Nel mesmu episodiu dexaron malferíu al tamién anarcosindicalista Francisco Comes, conocíu como "Perones", que morrería pocos díes depués.

Salvador recibió varios homenaxes posteriores a la so muerte, como la Fundación Salvador Seguí.

Ta enterráu nel cementeriu de Montjuïc de Barcelona, nuna zona próxima a les tumbes d'Anselmo Lorenzo, Francesc Layret y Francisco Ferrer.

Referencies

1. Aisa, Ferran. Una història de Barcelona, Ateneu Enciclopèdic Popular (1902-1999). Lallevir SL / Virus editorial, Barcelona,2000
2. Cruells, Manuel. Salvador Seguí: el noi del Sucre. Barcelona, Ariel, 1974
3. Solà, Pere. Las escuelas racionalistas en Cataluña (1909-1939). Barcelona, Tusquets editor, 1976.
4. 0-19-280129-5
5. Autores varios.Història de la cultura catalana. Edicions 62, Barcelona, 1999
6. GUÉRIN, Daniel: No Gods, No Masters: An Anthology of Anarchism. AK PressPolitics, 2006. 1-904859-25-9

• Datos: Q2915830
• Multimedia: Salvador Seguí