Raymond Radiguet (18 de xunu de 1903, Saint-Maur-des-Fossés – 12 d'avientu de 1923, XVI Distritu de París) foi un escritor francés, conocíu especialmente pola so novela El diablu en cuerpu. Fíu del dibuxante satíricu Maurice Radiguet, yera'l mayor d'una familia de siete hermanos.
Biogafía
A los 15 años dexó los estudios y entamó a collaborar nel periódicu L'Intransigeant, onde so padre publicaba caricatures.
Mas tarde, col nomatu de Rajki, publicó dibuxos, poemes y cuentos en Le Canard Enchaîné y na revista de vanguardia Sic. Al mesmu tiempu escribió reportaxes pa L'Eveil o L'Heure y convirtióse en secretariu de redaición de Le Rire .
En París trabó amistá con escritores como Joseph Kessel, Max Jacob y Pierre Reverdy, con pintores como Juan Gris, Picasso y Modigliani y compositores como Eric Satie, Georges Auric y Darius Milhaud. Sicasí, la persona que diba tener la mayor influyencia na so carrera foi Jean Cocteau, que lu ayudó a publicar los sos poemes nes revistes de Tristan Tzara (Dada) y d'André Breton (Littérature).
Radiguet collaboró con Cocteau, Milhaud y Auric en varies actividaes: la creación de la pantomima El güe nel teyáu (Le boeuf sur le toit) en 1919, la fundación en 1920 de la revista de vanguardia Le Coq o la escritura del llibretu de la ópera cómica Paul et Virgnie y de la comedia en dos actos Los pelícanos (Les Pélicans).
En 1920 publicó un llibru de poemes Los Papos ardientes (Les Joues en feu), con ilustraciones de Jean Hugo.
Hacia 1921 Radiguet abandona la vida desordenada que llevaba dende facía unos años, y imponse una fuerte disciplina. En setiembre d'esi añu, en Piquey, lloñe de París, onde lu arrastrara Jean Cocteau, terminó d'escribir El Diablu en cuerpu (Le Diable au corps, traducción asturiana de Xulio Vixil Castañón). La publicación d'esta novela en 1923 provocó un escándalu sonáu en Francia, al presentar l'amor adúlteru ente un adolescente y la muyer d'un soldáu combatiente na Primer Guerra Mundial.
El mesmu añu, Raymond Radiguet morrió víctima d'unes fiebres tifoidees.
En 1924, gracies a Cocteau, publicóse la so novela póstuma, El baille del conde d'Orgel ( Le Bal du comte d'Orgel ), qu'escribiera nel añu 1922, en Lavandou, siempre con Cocteau y los sos amigos.
Referencies
- ↑ 1,0 1,1 Afirmao en: autoridaes BNF. Identificador BnF: 119209880. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
- ↑ 2,0 2,1 Afirmao en: Le Figaro. Data: 13 avientu 1923. Páxina: 2. Editorial: Société du Figaro. Llingua de la obra o nome: francés. ISSN: 0182-5852.
- ↑ Afirmao en: Deux siècles d'histoire au Père Lachaise. Páxina: 663. Autor: Paul Bauer. Llingua de la obra o nome: francés. Data d'espublización: 2006.
Enllaces esternos
