María Balbín de Rodríguez (17 de marzu de 1877, Caravia La Baxa – 1961, Uviéu) foi una escritora y maestra de segunda enseñanza, vocación que-y llevó la vida entera.
Biografía
En 1911 casó col tallista Enrique Rodriguez, de quien tomó'l segundu apellíu (el d'ella yera Fernández). Dio clase primero en Cabranes, Ḷḷuarca y Cuideiru hasta llograr la plaza definitiva n'Uviéu en 1933. María Balbín collaboró davezu en revistes y periódicos d'España y América. En 1957 espublizó Tríptico, una seleición de poemes n'asturianu y en castellán n'edición non venal. Morrió n'Uviéu en 1961.
Narradora, poeta, dramaturga, ensayista, conferenciante, educadora y articulista española, nacida en Caravia (Asturies) el 17 de marzu de 1877, y finada n'Uviéu en 1961. Pola riqueza y variedá de la so producción intelectual y artístico, asina como pola so valentía nel usu y la defensa del asturianu como llingua lliteraria, ta considerada como una de les figures más sobresalientes de les Lletres asturianes del sieglu XX.
Vida
Los sos padres, Mateo (armador de carros) y Josefa (cordudera) tuvieron siete fios, trés neños y cuatro neñes, y nun disponíen de munchos medios económicos.
Dende bien nuevu amosó un acusáu interés escontra toles parceles humanístiques, anque la escasez de bienes de la so familia torgo-y recibir, nun primer momentu, una educación curioso. Sicasí, la so firmeza y tesón nel enfotu de formase como educadora viéronse compensaos pola imprevista ayuda qu'empezó a unvia-y dende tierres americanes (Cuba) un hermanu mayor (Urbano), arriquecíu na so aventura indiana. Con esti dineru consiguió la moza María Balbín rematar los sos estudios cimeros de Maxisteriu na ciudá d'Uviéu, de mano darréu a exercer la docencia en numberosos pueblos del so Asturies natal.
Coles mesmes, empezó a faer públiques -sobremanera, al traviés de los distintos medios de comunicación del so ámbitu llocal- dalgunes de les composiciones lliteraries que venía escribiendo dende la so niñez, colo que llueu escomencipió a ganar un ciertu prestíu como escritora na so redolada geo-cultural. Asina, por casu, cuando se topaba destinada como maestra en Ḷḷuarca publicó dellos escritos y artículos n'El Porvenir de Luarca, y en dicha población collaboró tamién con La Democracia de Luarca; amás, collaboró con ciertu avezamientu nes revistes El Eco de Cabranes, Asturies y El baluarte de Cudillero, y nos diarios El Carbayón y Rexón. Precisamente foi nuna de les mentaes publicaciones, El Porvenir de Ḷḷuarca, onde María Balbín publicó'l so primer testu famosu, un monólogu n'asturianu que, al cabu de los años, convenientemente ampliáu y retocáu, fíxose acreedor d'un importante premiu local (1926).
A estes actividaes docentes, lliteraries y periodístiques vieno sumase la so condición d'amena y falanciosa conferenciante, que la llevó per distintes tribunes asturianes pa disertar alrodiu de les sos temes predileutos: la educación, el feminismu y el bable. Entós daquella, María Balbín yá contraxera matrimoniu con Enrique Rodríguez González, un profesor de Belles Artes del que la nueva escritora tomó'l primer apellíu pa añader al so nome de soltera y roblar los sos escritos como María Balbín de Rodríguez. Convien destacar l'importante papel desempeñáu pol profesor Rodríguez González nel desenvolvimientu de la trayeutoria lliteraria de María Balbín dende'l mesmu momentu de la so boda (celebrada en 1911), yá que, lloñe de lo que solía ser habitual ente los homes de la so dómina, non yá nun s'opunxo a que la so brillosa esposa siguiera escribiendo, sinón qu'inclusive la sofitó y animó en toles sos actividaes intelectuales. Tanto foi asina, que la escritora asturiana pudo desendolcar la so carrera docente, lliteraria y periodística a pesar de ser madre de cuatro fiyos.
Dempués de munchos años destinada como maestra en distintes poblaciones de la so rexón, María Balbín foi treslladada a Uviéu (1939) por que siguiera exerciendo los sos llabores educativos nun centru escolar de la capital asturiana. Ellí siguió alternando esta función docente cola so dedicación a la lliteratura, magar nun publicó nengún llibru mientres tola so dilatada carrera lliteraria, con esceición del que diera a la imprenta en 1930, sol títulu de Añoranzas. En 1947, dempués de dedicar casi mediu sieglu a la enseñanza, María Balbín llogró la so xubilación como maestra (1947), lo que-y dexó consagrase a la rellectura y revisión de delles de les sos obres, y a la composición de nuevos poemes.
Foi una muyer d'una amplia cultura, y con aficiones pictóriques y musicales. La rellación más clara que se-y conoz colos intelectuales de la dómina venceyala al matrimoniu formáu por Mercedes Valero y Constantino Cabal. Les collaboraciones de María Balbín nel diariu Rexón correspuéndense xustamente cola dómina que foi direutor Cabal, y Mercedes Valero responsable de la seición de Sociedá. Sábese que se teníen una y otra amistá y almiración, y puede ser que tamién coincidieren claramente en delles actividaes culturales: les dos escribieron de temática relixosa, y hai noticies de dambes tuvieron dalguna manifestación pública en favor de la igualdá de los derechos de la muyer: María Balbín, como conferenciante na Escuela de Maxisteriu, trató temes rellacionaes col feminismu[2]. Magar que vivió tiempos políticos bien distintos y magar la solmenada vida social de l'Asturies del sieglu XX, nun se-y conocen manifestaciones al respective, nin enclín nengunu.
María Balbín vive nun periodu de grandes cambeos políticos, sociales y económicos: la crisis de la Restauración, la dictadura de Primo de Rivera, la Segunda República, la Guerra Civil y la Dictadura de Francisco Franco, pero nun paez qu'ello quedara reflexáu nos sos escritos calteníos, de los que tamién desconocemos la fecha na que se crearon na mayor parte de los casos.
Nesti sentíu, puede dicise que María Balbín nun ye bien distinta de los escritores contemporáneos que fixeron la obra n'asturianu, a nun ser delles esceiciones. Pero sí podemos dicir que s'estrema de les escritores contemporánees en castellán, tamién asturianes, que sí vivieron la lliteratura d'una manera más comprometida como Eva Canel o Eugenia Ástur, anque tamién ye verdá que les sos circunstancies vitales fueron otres.
La nuesa escritora espresa na so faer lliterariu les sos vivencies tomaes de la cultura tradicional, popular, de la relixón, del so oficiu (maestra) y de la materia primo del so oficiu: los neños, a los qu'adoraba.
Pero convien destacar que nun permanecía ayena a tolos problemes sociales que lu arrodiaben: la emigración a tierres americanes ye una tema recurrente na so poesía y na so prosa, pue ser porque-y tocó vivila en carne propio.
Temáticamente, nesti contestu históricu que-y tocó vivir a María Balbín, puede dicise qu'hasta la Guerra Civil significó un periodu muertu na so obra. Nun yeren esos tarreces terribles los qu'ella quería cantar nos sos poemes, sinón lo que supunxera cotidianidá, familiaridá, temes tan cotidianos y familiares que tenía qu'espresalos con un preséu tan propiu como la llingua materna: l'asturianu, anque tamién escribía na llingua que entos entendiase como culta, en castellán.
Obra
Al marxe de los numberosos escritos que dexó esvalixaos en distintos medios de comunicación, en 1930 vio la lluz la primer obra impresa de María Balbín de Rodríguez, una escoyeta de tres narraciones publicaes sol títulu de Añoranzas (Uviéu: Talleres tipográficos de Rexón, 1930). Esta obra contién dos rellatos escritos en asturianu (El fiu pide'l retratu y El Nuberu) y una redactada en castellán, dientro d'esa práutica habitual na escritura creativo de María Balbín, qu'alternaba indiferentemente dambes llingües.
Esta coleición de tres narraciones fora la única obra impresa de l'autora asturiana si nun mediara la sensibilidá artístico y filial de les sos fíes, qu'en 1957, con motivu del ochentenu cumpleaños de la escritora, axuntaron dalgunos de los sos poemes, narraciones y pieces dramátiques nun volume editáu espresamente como regalu personal pa María Balbín y un amenorgáu círculu d'allegaos (fíxose una amenorgada tirada de cientu cincuenta exemplares). A pesar d'estes humildes pretensiones, Trípticu, un llibru que nunca se punxo a la venta, tien el valor d'amosar una faceta lliteraria de María Balbín que, de nun haber quedáu impresa equí, perderíase pa siempres. Tratar de la so condición d'escritora teatral, especializada na composición de cuadros curtios destinaos a un públicu infantil, y concebíos -probablemente, dende la so simultánea condición de maestra y escritora- inclusive pa ser representaos polos mesmos neños.
La primera d'estes obrines, titulada ¡Que non voi a llindar güei!, ta escrita en versu y n'asturianu; la segunda, *Propósitu d'enmienda, tamién valse d'esta llingua asturiana y de una versificación n'octosílabos asonantes (romance); la tercera, titulada Momento escolar, recuerre de nuevu a la forma poética del romance, pero esta vegada en llingua castellana; y la cuarta y última, Paloma mensajera, presenta la mesma versificación ya idéntica llingua que l'anterior. Dada la so finalidá, son cuatro pieces curties na so estensión y cencielles no qu'a la so estructura dramática refierse, caracterizaes dende'l puntu de vista temáticu por una trupa carga relixosa que pretende tresmitir los vieyos valores del cristianismu más conservador al traviés de los distintos moralismos que cada obrina abasna.
Obres
- «Añoranzas» (1930)
- «Obres completes» (2000)
Referencies
- ↑ «rexistru d'autoridaes BNE». Consultáu'l 4 xunu 2020.
- ↑ PÉREZ-MANSU, Elvira María. Escritoras asturianas del siglo XX: entre el compromiso y la tradición (Oviedo: Servicio de Publicaciones del Principado de Asturias, 1991)
Bibliografía.
- FORMIGÓN, Juan Antonio (dir.) Autores en la Historia del Teatro Español (1500-1994). (Madrid: Publicaciones de la Asociación de Direutores de Escena de España, 1996). 2 Vols.
- PÉREZ-MANSU, Elvira María. Escritoras asturianas del siglo XX: entre el compromiso y la tradición (Oviedo: Servicio de Publicaciones del Principado de Asturias, 1991).
- SUÁREZ, Constantino. Escritores y artistas asturianos. Índice bio-bibliográfico (Madrid: 1936), vols. I, II y II; (Oviedo: I.D.E.A., 1959), vols. IV, V, Vi y VII.
Enllaces esternos
