Marian Beitialarrangoitia

Marian Beitialarrangoitia
diputada d'España 18 xunetu 2016 - 21 mayu 2019 Distritu: Gipuzkoa Eleiciones: eleiciones xenerales d'España de 2016 diputada d'España 12 xineru 2016 - 19 xunetu 2016 Distritu: Gipuzkoa Eleiciones: eleiciones xenerales d'España de 2015 Diputada del Parllamentu Vascu 20 payares 2012 - 7 xineru 2016 - Maider Otamendi Tolosa ^(es) → Distritu: Circunscripción electoral de Guipúzcoa ^(es) Eleiciones: X legislatura del Parlamento Vasco ^(es) Diputada del Parllamentu Vascu 20 payares 2012 - 6 xineru 2016 Distritu: Circunscripción electoral de Guipúzcoa ^(es) alcaldesa d'Hernani 16 xunu 2007 - 11 xunu 2011
Vida
Nacimientu	Legazpi, 20 de xineru de 1968 (56 años)
Nacionalidá	España
Estudios
Estudios	Universidá del País Vascu
Llingües falaes	castellanu vascu
Oficiu	política, periodista
Creencies
Partíu políticu	Euskal Herria Bildu

María Angeles Beitialarrangoitia Lizarralde (20 de xineru de 1968, Legazpi) ye una política española d'ideoloxía allegada a la izquierda abertzale. Anguaño ye diputada por Euskal Herria Bildu nes Cortes Xenerales y enantes foi alcaldesa de Hernani, Direutora de Comunicación de la Diputación Foral de Guipúzcoa y miembru del Parllamentu Vascu.^[1]

Biografía

Marian Beitialarrangoitia ye llicenciada en periodismu.^[1] La so llabor como periodista la realizó principalmente nel mediu radiofónicu. Trabayó na emisora de radio Egin Irratia, emisora creada en 1989 que pertenecía a la mesma empresa que'l diariu abertzale Egin. La so vinculación con Hernani data de la dómina na qu'empezó a trabayar nesti mediu y decidió vivir nesta llocalidá guipuzcoana, onde tenía la so sede Egin. En 1998 tanto'l diariu Egin como la emisora fueron clausuraes por orde del xuez Baltasar Garzón. Entós la periodista fichó por EITB, la radiotelevisión pública vasca, onde foi mientres unos años llocutora del programa de radio mañanera na emisora Euskadi Irratia, la emisora xeneralista en llingua vasca del grupu. Mientres el so periodu en EITB formó parte del comité d'empresa. Desque pasó a dedicase a la política en 2007 alcuéntrase en excedencia.

Trayeutoria política

La so entrada na política foi en 2007 cuando se presentó como candidata d'Aición Nacionalista Vasca a l'alcaldía de Hernani.

Tres la illegalización de los partíos allegaos a la izquierda abertzale pola aplicación de la Llei de Partíos, nenguna candidatura abertzale pudo allegar a les eleiciones llocales de Hernani nes eleiciones municipales de 2003. En 2007 el grupu abertzale de ANV con Beitialarrangoitia como candidata pudo sortear la illegalización al nun cuntar nes sos files con un númberu significativu de persones que participaren en candidatures abertzales anteriores, suerte que nun corrieron eses mesmes sigles n'otres llocalidaes. La candidatura de ANV quedó a un conceyal de la mayoría absoluta nel conceyu recuperando pa la izquierda abertzale un feudu tradicional, tres cuatro años d'alcaldía jeltzale.

Unes declaraciones de la alcadesa el 12 de xineru de 2008 nun mitin de ANV en Pamplona diéron-y relevancia nos medios de comunicación nacionales. Naquella ocasión pidió un aplausu ente otros pa Igor Portu y Mattin Sarasola, los etarres encausaos pol Atentáu de la T-4 de Barajas, que denunciaren tortures per parte de la Guardia Civil. Por esti fechu foi denunciada y darréu condergada en xunu de 2009 a un añu de cárcel pola Audiencia Nacional y a 7 de inhabilitación por un delitu d'enaltecimientu de terrorismu. Foi absuelta del otru delitu que se-y imputaba, inxuries graves a les fuercies y cuerpos de seguridá del Estáu, por llomar a los axentes de la Guardia Civil de torturadores.^[2] La sentencia foi recurrida y el Tribunal Supremu d'España absolvió en segunda instancia a l'alcaldesa d'esi delitu en marzu de 2010.^[3]

Tres la illegalización d'ANV, por considerar qu'asocedía a candidatures ilegalizadas, quedó eslleíu'l grupu municipal al que pertenecía; sicasí, pudo exercer d'alcaldesa hasta'l final de la llexislatura. Mientres el so mandatu al mandu de l'alcaldía d'Hernani enllantóse na llocalidá un polémicu sistema de recoyida selectiva de basures conocíu como Puerta a Puerta (PaP).

Nes eleiciones municipales y forales de 2011 nun se presentó a la reeleición. La coalición Bildu ganó les eleiciones forales en Guipúzcoa, llogrando'l gobiernu de la Diputación Foral de Guipúzcoa. El nuevu executivu lideráu por Martín Garitano nomó-y Direutora de Comunicación de la institución.

Darréu foi miembru del Parllamentu Vascu, yá que ocupó'l tercer puestu de la candidatura Euskal Herria Bildu pa les eleiciones al Parllamentu Vascu de 2012, pola circunscripción de Guipúzcoa, resultando escoyida pal cargu. Arrenunció al mesmu al ser escoyida diputada nes eleiciones xenerales d'España de 2015.

Referencies

1. «Entrada na páxina oficial del Congresu de los Diputaos». Consultáu'l 11 de xunetu de 2017.
2. «La alcaldesa de Hernani, condenada a un año de cárcel por enaltecimiento de ETA», La Voz de Galicia, 6 de xunu de 2009.
3. «El Supremo absuelve a la alcaldesa de Hernani de enaltecer a ETA Archiváu 2013-04-11 en archive.today», Noticias de Gipuzkoa, 18 de marzu de 2010.

Enllaces esternos

• Wikimedia Commons acueye conteníu multimedia sobre Marian Beitialarrangoitia.
• Ficha de Marian Beitialarrangoitia nel Parllamentu Vascu.

• Datos: Q5997371
• Multimedia: Marian Beitialarrangoitia