Manuel Abad y Queipo (1751, Villarpedre – 1825, Monasterio de Santa María de Sisla (es) 
) foi un relixosu asturianu qu'exerció'l cargu d'obispu de Michoacán en Méxicu, coles mesmes aportó a ministru n'España.
Biografía
Dempués d'estudiar en Cataluña pa sacerdote foi destináu a América. Ellí foi escoyíu obispu de Valladolid, nel estáu mexicanu de Michoacán. Propunxo delles reformes na alministración pa evitar la insurrección de los nativos, amosó ante Fernandu VII (1814) el so desalcuerdu cola actuación del virréi Calleja,[4] lo que-y valió ser acusáu de traición pol Santu Oficiu, pos defendió énte la Rexencia una llexislación agraria que dexara el repartu a los indios de tierres realengues y el so accesu al cultivu de los llatifundios.
En 1816 foi nomáu Ministru de Gracia y Xusticia por Fernandu VII, anque namái ocupó'l so cargu mientres tres díes, yá que foi destituyíu.
En produciéndose'l llevantamientu y criticar l'actuación española tuvo qu'encarar delles acusaciones énte la Inquisición n'España, a pesar de la so postura contraria a la sublevación y d'haber escomulgáu al insurxente Miguel Hidalgo. Finalmente, foi absueltu de l'acusación de traición a la corona, pero la «Sagrada Congregación del Índice» prohibió la so obra titulada «Breve exposición sobre el Real Patronato y sobre los derechos de los obispos electos de America, que en virtud de los reales despachos de presentación y gobierno administran sus iglesias antes de la confirmación pontificia.»
En 1820 foi escoyíu obispu de Tortosa, anque ocupó'l cargu de manera informal mientres el Trieniu Lliberal, yá que nun recibió la confirmación papal. En 1823, escorríu, de nuevu, polos absolutistes, foi recluyíu nel monesteriu toledanu de Sisla, onde pasó los sos dos últimos años de vida y onde finó enantes de cumplir la conderga de 6 años que-y fuera impuesta.
Edictos y cartes publicaes
- Edicto instructivo sobre la revolución del cura de los Dolores y sus secuaces, en 1810.
- Carta pastoral sobre la insurrección de los pueblos del Obispado de Michoacán, en 1811.
- Carta pastoral sobre el riesgo que amenaza la insurrección de Michoacán a la libertad y a la religión, en 1813.
Referencies
- ↑ 1,0 1,1 Afirmao en: SNAC. Identificador SNAC Ark: w65b2f6n. Apaez como: Manuel Abad y Queipo. Data de consulta: 9 ochobre 2017. Llingua de la obra o nome: inglés.
- ↑ Afirmao en: idRef. Identificador de referencia de idRef SUDOC: 147483689. Data de consulta: 5 marzu 2020. Editorial: Agencia Bibliográfica de Enseñanza Superior. Llingua de la obra o nome: francés.
- ↑ Afirmao en: Catholic-Hierarchy.org. Identificador Catholic Hierarchy de persona: abad. Data de consulta: 13 ochobre 2020. Llingua de la obra o nome: inglés.
- ↑ Zárate, 1880; 520-521:
Bibliografía
