Jacques Spon (auténticu nome Jacob Spon) (7 de xineru de 1647, Lyon – 25 d'avientu de 1685, Vevey (es) 
) foi un arqueólogu, historiador y médicu francés. D'orixe alemán, la so familia treslladárase a Francia en 1551. El so padre foi'l médicu Charles Spon. De confesión protestante, mientres tola so curtia vida, foi un fervosu prauticante y defensor de la relixón reformista.
Xunto al botánicu inglés George Wheler, viaxó a Grecia en diverses ocasiones ente 1675 y 1676 pa esplorar los monumentos de la Grecia Antigua. Nestos años foi unu de los descubridores del Oráculu de Delfos y d'ensame de pieces arqueolóxiques como monedes y manuscritos, munchos d'ellos legaos a la so muerte a la Universidá d'Oxford (pero esisten duldes). Tamién viaxó por Italia.
Ente les sos obres atópense Voyage d'Italie, de Dalmatie, de Grèce et du Levant, Geneva. Histoire de la république de Genève y Miscellanea eruditae antiquitatis, una obra d'epigrafía.
La Revocación del Edictu de Nantes, n'ochobre de 1685, foi indireutamente la causa del so decesu. En cuenta de abjurar del so fe calvinista, Spon prefirió dexar Francia y dise illegalmente a Zúrich. Col so dineru y equipaxe robaos, y en fráxil estáu de salú, expiró de tuberculosis nel Hospital cantonal de Vevey, el 25 d'avientu de 1685, con solu treintiocho años.
Referencies
- ↑ «certificado de bautismo». Consultáu'l 2 xunu 2023.
- ↑ Afirmao en: enciclopedia croata. Identificador de la enciclopedia croata: 57495. Apaez como: Jacques Spon. Autor: Dalibor Brozović. Llingua de la obra o nome: croata. Data d'espublización: 1999. Editorial: Miroslav Krleža Lexicographical Institute.
- ↑ Afirmao en: autoridaes BNF. Identificador BnF: 12298036k. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
- ↑ Biblioteca Nacional de Francia. «autoridaes BNF» (francés). Consultáu'l 10 ochobre 2015.
Enllaces esternos
