Grulla Blanca de Fujian
福建白鶴拳
|
|
|
| Tamién
|
Grulla Blanca de Fukien, Boxéu de la Grulla Blanca, Baihequan, Bai He
|
| Fecha de fundación
|
Sieglu XVIII
|
| País d'orixe
|
![]() China
|
| Fundador
|
Según la lleenda, Fang Qiniang
|
| Métodos téunicos
|
Entrenamientu de les formes (en delles escueles tamién con armes) y del combate
|
| Deporte olímpicu
|
Non
|
La Grulla Blanca de Fujian (福建白鶴拳) o Boxéu de la Grulla Blanca ye un estilu sureñu d'artes marciales chines con orixe na provincia de Fujian (福建) y qu'anguaño se prautica en tol mundu. Según delles tradiciones orales, la creación del estilu débese a una muyer, Fang Qiniang (方七娘). Ye un estilu d'imitación de Boxéu Shaolin basáu n'observar los movimientos, habilidaes de llucha y actitú de les grulles. Solamente hai otros cuatro animales nel Boxéu Shaolin, que son el Tigre, el Lleopardu, la Culiebra y el Dragón.
L’estilu carauterízase por posiciones bien baxes y fites, téuniques de mano complexes y combate sobre too a distancia curtia, como asonsañando a un páxaru picotiando. Sicasí’l boxéu de la Grulla Blanca tien una farracada téuniques de distancia llarga, masque prefiera’l combate zarráu emplegando les manes, como simulando un bater d'ales. Delles escueles de Grulla Blanca usen tamién mui bien d'armes tradicionales, mientres qu'otres dexaron esti tipu de práutica.
La lleenda de la Grulla Blanca
La familia Fang vivía na provincia china de Fujian (Fukien), nun llugar onde había manches grulles. El padre de Qiniang conocía los estilos sureños de les artes marciales chines y aprendió-ylos a la fía.
Un día, tando Qiniang a los sos llabores, amiyó una grulla a la vera. Qiniang quixo espantala usando un palu y les habilidaes qu'aprendiera de so padre, pero nun yera pa facer un movimientu que nun tornara la grulla. Qiniang tentó de cuti-y na cabeza, pero’l páxaru safóla y paró’l palu coles ales. Qiniang tentó entós de da-y nes ales, pero la grulla echóse a un llau y bloquió coles garres. Otra vuelta tentó Qiniang de solmenar a la grulla en cuerpu, pero ésta echóse p'atrás y dio-y un picotazu al palu.
Dende esa Qiniang estudió con procuru los movimientos de les grulles, y combinólos colos movimientos d'artes marciales qu'aprendiera del padre, creando asina l'estilu Grulla Blanca de Fujian.
Esta llenda tien munches versiones; en dalgunes la grulla nun bloquiaba’l palu de Qiniang, pero safábase y contratacaba. Esti estilu considera importante nun se centrar muncho nel usu de la fuercia física, sinón nos escapes y nos ataques a árees febles, como los puntos kyusho. Los recursos de combate de la Grulla Blanca son populares, sobre too pa la defensa personal femenina, darréu que por exemplu los rápidos movimientos de picotiar nun dependen de la fuercia.
Rames
Col tiempu la Grulla Blanca dixebróse en cinco estilos:
| |
Chinu |
Pinyin |
Dialeutu de Fujian |
|
| Boxéu de la Grulla que Duerme
|
宿鶴拳 |
sù hè quán |
siok4 hoh8 kun5 |
tamién conocíu como Grulla que Blinca o Grulla Ancestral
|
| Boxéu de la Grulla que Llora
|
鳴鶴拳 |
míng hè quán |
beng5 hoh8 kun5 |
tamién conocíu como Grulla qu'Apella, que Glaya o que Grita
|
| Boxéu de la Grulla que Come
|
食鶴拳 |
shí hè quán |
chiah8 hoh8 kun5 |
tamién conocíu como Grulla de la Mañana
|
| Boxéu de la Grulla qu'Esnala
|
飛鶴拳 |
fēi hè quán |
hui1 hoh8 kun5 |
tamién conocíu como fei hok kuen
|
| Boxéu de la Grulla que Tiembla
|
縱鶴拳 |
zong hè quán |
hui1 hoh8 kun5 |
tamién conocíu como jun hok kuen
|
Historia
El maestru Jwing Ming Yang, de la Grulla que Duerme, data la creación de la Grulla Blanca de Fujian pal 1700 aproximao.
Según les tradiciones de la rama de la familia Lee del mesmu estilu, Fang Qiniang nació a mediaos del sieglu XVIII. Según esto, el llinax d'Ong Gong Shr Wushuguan de la ciudá de Yongchun, na prefeutura de Quanzhou, provincia de Fujian anició cuando Fang Qiniang aprendió a los sos fundadores en tiempos del emperador Ming Jiazheng. Pero nun hubo emperador talu, anque sí un emperador Ming llamáu Jiajing, que reinó de 1521 a 1566. Nesta zona de Yongchun dizse que tamién tán los biltos del Wing Chun y del Kárate.
Li Wenmao, históricu actor d'ópera y cabezaleru de la Rebelión del Turbante Bermeyu de 1854-1855, prauticó al paecer l'estilu Yongchun de Grulla Blanca.
L’estilu Xu Xi Dao de Grulla Blanca, según lu enseña Chen Zuo Zhen, descríbese en www.chinesemartialarts.eu > White Crane Style. L’estilu Xu Xi Dao deriva del Zhong Ho “Grulla Saltarica” y foi desendolcáu en Taiwán por Huang Lao Yang nos años 1950.
Téunica
Nel Boxéu de la Grulla Blanca les manes golpien imitando’l picu de la grulla. Los movimientos surden del espinazu. Hai poques téuniques de pie/pierna.
Les formes usen como arma partes estremaes (coldos, deos, piernes, manes, puños) nel contestu de movimientos de defensa personal coordinaos, flexibles y potentes. Evítase la oposición al ataque del contrariu, al envís de dililu y atopar apertures pa solmenar golpes destructivos. Les formes, de boxéu en curtio sobre too a mano vacía, desendólquense na práutica del combate.
Influyencies
La Grulla Blanca de Fujian ye ún de los estilos que formaren los Cinco Ancestros.
Los Cinco Ancestros, asina como dellos estilos de Kárate (sobre too Goju-ryu, Chito-ryu y Uechi-ryu), recibieron la forma San Chian/San Zhan de la Grulla Blanca de Fujian. La forma San Chian conozse más pola pronunciación xaponesa del nome: Sanchin.
Referencies
Enllaces esternos
