Desmotadora

Desmotadora
maquinaria agrícola ^(es)

Desmotadora exhibida nel Eli Whitney Museum (Connecticut).

Patente orixinal de la desmotadora (14 de marzu de 1794).

Una desmotadora o almarrá ye una máquina que dixebra rápida y fácilmente les fibres d'algodón de les vainas y de les sos granes, que n'ocasiones son pegañoses. La desmotadora usa una pantalla y unos pequeños gabitos d'alambre qu'emburrien l'algodón al traviés d'ella, mientres unos cepiyos esanicien de cutio los filos d'algodón sueltu pa evitar atascos.

Esti artiluxu foi desenvueltu por Eli Whitney en 1793. Esta pequeña máquina dexaba esta separación a gran velocidá y de manera económica, pudiendo abastecer a la creciente demanda d'algodón en brutu tres la invención del telar.

Invención

Eli Whitney inventó esta senciella máquina en 1793 pa mecanizar la producción de fibra d'algodón. El inventu recibió una patente el 14 de marzu de 1794. La desmotadora supunxo un fuerte activu pa la economía estauxunidense de la dómina.

Esiste ciertu discutiniu sobre si ye correutu atribuyir a Whitney la idea de la desmotadora y los sos elementos constituyentes. Dalgunos consideren que la invención, o siquier el conceutu orixinal, tien d'acreditase a Catherine Littlefield Greene, la so patrona. Naquella dómina les muyeres nun podíen recibir patentes n'Estaos Xuníos y pue que Greene pidiera a Whitney que la tramitara nel so llugar. Los rexistros de la oficina de patentes tamién indiquen que la primera desmotadora puede ser construyida por un mecánicu llamáu Noah Homes dos años primero que Whitney solicitara la so patente.

Según Joseph Needham, na India presentóse un precursor de la desmotadora conocíu como charkhi, que cuntaba con dos tornillo ensin fin allargaos usaos pa xirar los sos rodiellos en direiciones opuestes.^[1]

Funcionamientu

Les desmotadoras pequeñes yeren operaes a mano, mientres les mayores yeren movíes por caballos o por molino d'agua.

Col pasu del tiempu, les desmotadoras fueron perfeccionándose p'ameyorar el procesu de separáu de la fibra d'algodón. Les máquines fueron faciéndose mayores y más complexes, incluyendo una progresiva mecanización y automatización.

Anguaño les desmotadoras son plantes completes de maquinaria que realicen un procesu bastante más complexu pa dixebrar los filos d'algodón del restu de la planta recoyida, incluyendo otres máquines pa retirar les refugayes resultantes y empaquetar l'algodón crudo en bales más fáciles de tresportar.

Notes

1. Joseph Needham. Science and Civilisation, IV(2), páxs. 122-124.

Enllaces esternos

• Visión xeneral del procesu modernu de desmotado (USDA, inglés)
• L'historial del algodón (National Cotton Council of America, inglés)
• Historia del desmotado, por William H. Phillips, Universidá de Carolina del Sur (inglés)
• Invención de la desmotadora Archiváu 2014-05-27 en Wayback Machine, por William O. Scheeren (inglés)